بكره أنا شايف أنا شايف للحلم شفايف أنا سامع مصر ف صوت واحد والصوت بيقول أنا مش خايف أنا شايف مصر بتتحرر وقيود السجن بتتكسر والحق بيرجع لصحابه ومصيرها بأيدها بيتقرر أنا شايف مصر أم الطيبة بتعود من أسر التغريبة بتبوح بالكامن فى ضميرها وتقول على سر التركيبة أنا شايف مصر الولادة فرشت لولادها السجادة احساسى الصادق بيقوللى رقبتها ح ترجع سدادة أنا شايف مصر بتتحول وبترجع أحسن م الأول والمصرى الواثق من نفسه بيغوص فى العلم ويتجول أنا شايف مصر بتتقدم وبتقرا وتكتب وتعلم ومع اللى يعادى ماترحمشى وع اللى يسلم بتسلم أنا شايف مصر بتتطور بشبابها الواعى المتنور نازل بيجمّل شوارعها ومحدش نازل يتصور أنا شايف مصر بتتعمر وربوع صحاريها بتتخضر والخير بسواعد فلاحها بيكفى وبيفيض ونصدر أنا شايف مصر الأثرية بجمال مناظرها الطبيعية قبلة سياح المعمورة ومقر أمان البشرية أنا شايف مصر المحروسة بمشاعر دافية ومحسوسة فى قلوب اخواتها بتتربع فى عيون الكون أحلى عروسة