يا علة.. ناوى تودينا على فين.. خليت حياتنا مملة.. ولا نافع فيك فيتامين.. يا روتين الحكومة يا قديم.. ف المكاتب كفاياك تعشيش.. عايزين نظام سليم.. ميقولش ع الرشوة بقشيش.. يا روتين الحكومة.. ف كل مصلحة.. الناس معاك مظلومة.. وموظفينك مرحرحة.. نفسنا يعملوا منظومة.. وأنت متبقاش فيها.. ويخفوا عن الناس المهمومة.. من عمايلك وبلاويها.. يا روتين الحكومة.. الناس ياما زلتها.. ف طوابير بالكومة.. من عندك لحد بيتها.. يا روتين الحكومة.. ياما لففتنى أيام.. عشان ورقة مختومة.. م الوجع مش عارف أنام.. يا روتين الحكومة.. بقيت منك موجوع.. وموظفينك زهقونا.. ب فوت بعد أسبوع.. خليت الموظفين.. بقت بطيئة.. والحاجة بتقعد سنين.. وهى تخلص ف دقيقة.. يا روتين الحكومة.. يا باين ف مكاتبهم.. أخطاءهم كتير بالكومة.. ولا حدش بيحاسبهم.. يا روتين كفايانا مشوّرة.. ولا خلاص بقيت عادة.. دى حكومتك سيطرة.. شربتنا المر بزيادة.