سيتم حجب هذه الصورة تلقائيا عندما يتم الإبلاغ عنها من طرف عدة أشخاص.
نائب منفلوط فى أجرأ حوار ل"اليوم السابع": "عاوز حصانة بره المجلس مش تحت القبة.. ومعنديش مانع الشرطة تفتشنى".. حلمى محمد: "اللى هييجى على مصر هنفرمه".. وللمسئولين بدائرته: "إحنا عايشين فى مستنقع زبالة
قال حلمى أحمد محمد، عضو مجلس النواب، عن دائرة منفلوط بأسيوط (مستقل)، إنه يريد حصانة أكثر من أجل ممارسة حقه بشكل كاف، موضحا أنه لا يريد الحصانة داخل البرلمان فقط بل فى الشارع، لأن النواب يراقبون الحكومة، موضحاً أنه لا يبالى من تفتيشه من قبل أفراد الشرطة، وتابع: "هو أنا هشيل مخدرات". وأضاف النائب فى حوار مع "اليوم السابع"، أن عددا من نواب الصعيد المستقلين سوف يشكلون تكتلا من أجل الدفاع عن حقوق المواطنين والبلد، مشددا بالقول: "اللى هيفكر ييجى على البلد هنفرمه".. وإلى نص الحوار. ما تقييمك للمجلس القادم وتوقعاتك له؟ أفضل مجلس على الإطلاق لأنه منتخب من قبل الشعب وجاء بانتخابات نزيه وأتوقع له النجاح ومواصلة خارطة الطريق التى بدأها السيد الرئيس عبد الفتاح السيسى، بعد 30 يونيو، والنواب هيكملوا المشوار من أجل خدمة الوطن والمصريين والقضاء على الإرهاب. هل ترى أن البرلمان سيكون عائقا للرئيس؟ على الإطلاق، إحنا هدفنا خدمة البلد، و"أظن دا كمان اللى الرئيس بيعمله وإحنا هنكون عكاز الرئيس اللى هينفذ بيه الإصلاح والنهوض بالوطن". هل ترى أن الخمسة عشر يوما المخصصة لمراجعة القوانين التى صدرت كافية؟ لا طبعا، الفترة هذه قصيرة جدًا، ومتنفعش ومش أقل من شهرين لأن دى قوانين ولازم ندرسها كويس علشان دى تشريعات ومواد وقوانين وكمان لو الفترة أكتر من كده مفيش مانع لأن كل ما درسنا الموضوع بشكل كويس وفترة كافية هنقدر نخلى القوانين المفيدة ونعترض على اللى عليه ملاحظات. ما هى القوانين التى تبدى اعتراضك عليها؟ منها القانون الخاص بصلاحيات الرئيس لأن المفروض يبقى فيه صلاحيات أكتر لمواجهة الإرهاب والتطرف والقانون الخاص بحصانة النواب لازم نتمتع بحصانة كاملة علشان نقدر نعمل اللى عاوزينه فى خدمة أهل الدائرة ولكن بشروط. وماذا تعنى حصانة أكتر؟ يعنى لما أدخل على محافظ أعرف أحاسبه وأراقب المحليات ومن الآخر عاوزين حصانة بره المجلس مش تحت القبة بس، الأهم الشارع. وما هى الشروط لهذه الحصانة؟ الموضوع مش حصانة وخلاص أنا معنديش مانع أتفتش فى الشارع لأن أنا مش هشيل مخدرات ومعنديش مشكلة أن رجال الشرطة يوقفونى ويفتشونى علشان دا شغلهم واللى يتمنظر بالحصانة يسحبوا منه الكارنيه على طول لأن إحنا عاوزين حصانة أكتر للخدمة ومش للمنظرة. هناك حملة لتعديل الدستور.. ما تعليقك؟ طبعا الدستور لازم يتغير بس أنا قرأت نصه بس لكن الطبيعى أنه فيه مواد بعد دراستها بشكل كامل هيكون لينا فيها كلام تانى والأهم طبعا مصلحة البلد سواء مع تعديل الدستور أو مع بقائه دون تغيير. من تتوقعه رئيس البرلمان القادم؟ أتمنى المستشار عدلى منصور لأنه رجل قانون وفاهم كويس يعنى أية تشريعات وهو دا المطلوب فى الفترة الحالية. ما تقييمك لأداء الحكومة الحالى؟ هنحكم عليها بعد ما تعدى فترة كافية نقدر نقيمها لكن على المستوى العام الأداء متوسط. ما أول استجواب أو طلب إحاطة ستتقدم به فور انعقاد المجلس؟ الاستجوابات كتير وطلبات الإحاطة كمان لكن أهم حاجة استجواب لوزير الصحة، لأن المستشفيات عندنا فى أسيوط سيئة جدا مفيهاش أجهزة ولا معدات ولا دكاترة ولما يعرفوا أن الوزير جاى بيخلوا المستشفى 10 نجوم وبعد ما يمشى ترجع ريما لعادتها القديمة ونفسى الوزراء يبطلوا يعملوا كدا، لأن طول ما هما بيبلغوا إنهم رايحين جولة لمستشفى أو غيره مش هنحل المشاكل لأن الوزير لما بييجى المستشفى مبيبقاش فيها مشكلة وأنا هحارب الظاهرة دى عندنا فى أسيوط. وما هى أهم المشاكل فى الدائرة؟ إحنا عندنا مشاكل كتير جدا أهما الصرف الصحى ومياه الشرب ووحدة المرور اللى مش شغالة وعندنا كوبرى فى أم القصور وكمان فيه حتة أرض مستنقع مليانة حشرات وأوبئة وكلمنا وزارة البيئة والشباب والرياضة ومفيش حل مع أنها ممكن تصيبنا بالأمراض الخطيرة وخاصة الأطفال فياريت المسئولين يرحمونا من المستنقع اللى عايشين فيه. وهل هناك مشاريع قوانين لحل هذه المشاكل؟ طبعا فيه مشاريع كتير هنتفق أنا والنواب الصعايدة المستقلين عليها من أجل النهوض بمصلحة البلد. هل هذا يعنى أنكم ستشكلون تكتلا داخل مجلس النواب؟ إحنا أهم حاجة مصلحة مصر وهننضم لأى حزب يكون هدفه خدمة مصر أيا كان وكمان إحنا جميع نواب الصعيد هنكون تكتل اللى هييجى على بلدنا هنفرمه. هل طلب منك أحد من دائرتك خدمة شخصية؟ الحقيقة كل الناس عارفة أن مفيش خدمات شخصية والكل بيطلب خدمات عامة، وأنا من خلالكم بحب أوجه رسالة إلى وزيرة التضامن أقولها فيه ناس عندها أفدنة وبياخدوا معاش وناس مش لاقيين ياكلوا مبياخدوش حاجة حرام فين العدل. ما هى اللجان التى ستنضم لها؟ الزراعة طبعا علشان الفلاح عندنا فى الصعيد مش واخد حقه والمهمة صعبة على النواب فى المجلس القادم. موضوعات متعلقة.. - "اليوم السابع"تحاور أول نائب عن "حلايب وشلاتين".. ممدوح عمارة: أتوقع تعاون أجهزة الدولة معى لرفع المعاناة عن الأهالى.. ودائرتى ليست منطقة مهمشة ومواردها غير مستغلة.. ونريد عودة مصر والسودان دولة واحدة - النائب معتز محمود فى حواره ل"اليوم السابع": مصر دولة طاردة للاستثمار.. تحكمنا قوانين من الخمسينات.. أحذر من ثورة جياع أن لم نحل مشاكل الاقتصاد.. والحكم على الحكومة يتطلب منحها أدوات النمو الاقتصادى - أول حوار مع رئيس برلمان مبارك منذ 2012.. فتحى سرور: الدستور الجديد يحتاج لتعديل.. وبعض البنود لا تتناسب مع المرحلة الدقيقة فى مصر..أشهر رؤساء مجلس الشعب: رئيس المجلس مش «ترزى قوانين» ولن أعود للسياسة
