وفْرِحتى لمّا عرفتى إنّى ف بطنك بتخلَّق وبقيت جواكى فى حشاكى أنا حتة لحمه ومتعلَّق من دمك باكل واتغذى وبارفَّس فيكى برجليَّه ولا عمرك قلتى أنا بتأذى لا ف رُوحَه منى ولا ف جَيّه وضلوعك كانت تتوجَّع واللقمه ف معده بتترجَّع والدوخه ف شهور الحمل وف بطنك باسرح كالنمل وفضلتى يا أمى تستنى عايزانى أجيكى وتتهنِّى وبتحكى لابويا على شكلى وبتاكلى ياأمى عشان أكلى مربوط أنا فيكى بالسرَّه وشهورى التسعة يا ناس مُره وجاتك يامَّه أوان ساعتى والموت بعنيكى وشايفاه وعذاب أنفاسك والحزق محشور أنا فيكى كماللزق وسمعتى الصرخه يا أمى بتاعتى ونسيتى بإنك جوا الموت وقلتى ضناى دا أنا أول شوفى ف الدنيا عيونك بالضحكة مليانة حنان رغم الدنيا الواسعة الهِو من لمسك حاسيتها أمان يا حلاوة الفرحه باحساسك طلعتلى سنان وأنا لسه صغيّر ف اللفة تاخدينى ف حضنك بدَّفه وتدلّى فيّا وبتشيلى وبصوت حنيَّه تغنيلى وتقيسى بالشبر وكفه وتقولى امتى يا نور عينى؟! أرقص يوم فرحك ف الزفة وحابيت تا تا تاتا وباخطِّى وبحضن حنانك متغطِّى أنا كنت يا دوبك أشاورلك ولا حد فاهمنى كان غيرك وصبحت أنا راجل وكبرت ولا قادر أوَفِّيلك خيرك لمَّا عيونك بتشوف فرحى من فرحتها يا أمى تدمَّع لما ف لحظة تحسى بجرحى يصرخ قلبك حزن يسمَّع لما أسافريوم ف الغربة ولا أكون مهموم بالكربة نبرة صوتى ونبرة حسى من حنانك بى تحسى يسألوكى بتبكى ليه تقولى ابنى يا ناس بعيد وقلبى متاخد عليه يالهفة قلبك على وجعى والقلق اللى معشعش فيكى وتقضّى ليالى سهرانة والنوم يجافيكى دا أنا مهما أبرك ف حياتى ولا طول العمر هاكفيكى أنا كنت اتشعبط ع اللعبة وأقولك لازم تجيبيها ياما كنت اتشاقى وأضايقك وغلاستى كنتى تحبيها على حسّك قاعد بتدلَّع وكأنى أنا نونو صغيّر وحريقة ف قلبك بتولّع لو باحكى ف مرة متغير لو شفتى عيونى سرحانه بتقولى أنا فاهمه ملامحك وساعات ف عيدك بنساكى وتقولى أنا قلبى مسامحك أمى يا سر وجودى وذاتى أمى يا بلسم يشفى آهاتى حافظة عيونى لما بتكلم قلبك ينزف لو بتألم قلبك يسمع همس دموعى يدعى بلهفة يارب تسلّم مين غيرك أنتى عليّا حنيَّن؟! ياما بنقسى وقلبك ليّن ياما خدتنى عيالى دى منك ياما كتير مشغول أنا عنك يا ما رحمتش يوم أنا سنك والغلطة وغلطة تعديها ولا قلبك عمره بيبيِّن دا حنانك نبضة فى وريدى والوردة الحلوة وغصونها يا أغلى نعمة بين إيدى وفقنى يا ربى أنا صونها والعمرسرَقْنا والبعد فرَقْنا من غيرك أنا قلب جريح من بعدك واقف متعرى وحدى وف وش الريح ندمان ع اللحظه اللى ماكُنتش كسبان لرضاكى زعلان ع الكلمة اللى فاتتنى من بر دعاكى سامحينى يا أمى ع اللحظة الحلوة اللى ماكُنتش باقضيها معاكى
