يا حبيبتى يا سندى ويا ضهرى بشكيلك من مرِّى وقهرى فى ترابك ما لقتش اللقمة وغيلانك نصبولى ف قبرى بعتونى أشرَّق وأغرَّب وركبت المركب متهرَّب والفقر لاسعنى ومتكهرب وضلوع الهم المكسورة وزكايب حزن ومبدورة والصعب يضلم ف الصورة ولا لاقى ذرة حنيَّة ولا نسمة حب معدية ولا فجر منوَّر صبحية ف الغربة بناطح وبقوة بشهامة وبكل مروَّة والقلب مقطَّع من جوة ولا شايف حد بيسندنى وزمانى دايما معاندنى من خرم الإبرة بينقدنى أمّنتك على ولدى وبيتى ع الفرشة ونومتى وجلابيتى على نيلك إن مرة سهيتى على شمسك على قمح عيدان على غيطك مليان بكيزان لتبصى لابنك غلبان ف البعد بيحضن غناويكى بَعْشَقْها ولا حد شريكى راجعين لك وهنفرح بيكى لو حتى راجع لك جثمان اكتبى على قبر الغلبان ابنك يا بلدى العشمان فى حياته ما هانش عليه بلده فى مماته فكّيهِ من قهره