أشيل من الخطوة خطو إيه وأحوش من البسمة بسماية وأعين فى القلب دقاية وأخبى فيا ما فيا ما يمكن يوم أكون شاعر فى عالم ابن إنسية ......... لا أنا حاوى ولا نيلة ولا بمشى بتفعيلة لكنى باعشق الحيلة وبتحايل على الأيام عشان أفضل أنا الإنسان ويفضل فيا قنديلك ينور لحظة مخنوقة فى أحزانها هتدعيلك وأحلف ميت يمين بالله بأن الجاه ملوش معنى لو أتباعنا فى سوق الناس ......... برتل كل يوم دستور وأبات مستور فى حضن سطور بتحمينى فتتكون حروف دينى فى حلم العدل ويا النور ....... أنا إنسان وحظى إنى جيت الآن فى عالم عاش حزين قلقان وطبعه جنان على الآخر لكنى باعرف أتاخر لحد الركن واستنى يا يجى الفجر يندهلى يا يفضل حلمى بالجنة * مصرى مقيم فى البرازيل