كلمة رددها قاضى ما يسمى ب«محاكمة القرن»، وهى بكل أسف جملة تلخص بالفعل الحالة التى وصلت إليها البلاد بعد ثورتين، وتعطى أمرا للجميع بأن يعودوا إلى مقاعدهم ومناصبهم، فكأن ثورة لم تقم، وكأن نظاما لم يسقط، فليعد مبارك رئيسا، وليعد العادلى وزيرا، ولتعد قيادات الداخلية إلى مناصبهم، فالبراءة أصبحت من نصيبهم جميعا، ولنلغى الدستور الذى يحتوى على ما يسمى ب«ثورة يناير» التى اكتشف الشعب أنها بالفعل «مؤامرة»! ولنقم نحن جميعا «من فكر ودعا وحشد وشارك وآمن بثورة يناير» بالاعتذار للشعب المصر. إحنا آسفين يا شعب إن إحنا حلمنا بوطن تسوده عدالة إنسانية واجتماعية. إحنا آسفين يا شعب أن إحنا كنا بنادى ونطالب بالكرامة الإنسانية. إحنا آسفين يا شعب علشان كنا عايزين نعيش أحرار. إحنا آسفين يا شعب علشان كنا عايزين مايبقاش فيه فقر وتصدر هتافنا «عيش». إحنا آسفين يا شعب إن إحنا كنا عايزين ننهى عصر الديكتاتورية والفساد. إحنا آسفين يا شعب إن إحنا قلنا كفاية تعذيب. إحنا آسفين يا شعب إن إحنا منسناش العبّارة والدويقة والمواد المسرطنة والدم الملوث. إحنا آسفين يا شعب إن إحنا كنا عايزين قصاص. افرحوا ببراءة مبارك وهللوا فى الإعلام وبرروا البراءة «إلا من رحم ربى»، وزغرطوا وارقصوا على جثث الشهداء وانسوا كلامكم بأن الرئيس الحالى ورث منظومة كاملة من الفساد طيلة 30 عاما، ومتصبروش عليه علشان الرئيس الأسبق كان ملاكا وانتوا فرحنين بالبراءة! خافوا من الإرهاب أكتر وأكتر لدرجة تنسيكم كرامتكم كبنى آدميين، بس افتكروا إن الإرهاب مش بس فى سيناء واللى بيقتل الضباط والجنود الأبرياء، الإرهاب كمان لما شباب فى عمر الورود يتقتل علشان نزل يقول «لا للبراءة»، الإرهاب كمان فى استمرار مسلسل الإهمال اللى بيروح فيه عشرات المواطنين يوميا، فيا ريت تخافوا وتقاوموا كل أنواع الإرهاب مش تقوموا إرهاب وتركعوا لإرهاب آخر، وافتكروا أيضا أن الإخوان هو تنظيم ترعرع وكبر فى عهد مبارك وعقد الصفقات مع نظام مبارك ليحصل على 88 مقعدا فى البرلمان، ونظام مبارك سهل لهم فتح الجمعيات الخيرية طوال ثلاثين عاما التى تصل إليها الأموال من تنظيمهم الدولى، مبارك هو من سمح بخلط الدين بالسياسة وانتشار شعار «الإسلام هو الحل» فى الانتخابات البرلمانية أثناء حكمه.. تخشون من إرهاب وتحتفلون ببراءة الراعى الأول للإرهاب فى مصر!!! أما أنتم يا من تمتلكون حلم الثورة إلى الآن ومتمسكين بمبادئها، فاعلموا أن أغلب الشعب الآن بكل أسف مبسوط بالبراءة ومبسوط بالحالة اللى وصلنالها ونسيوا مبارك عمل إيه فى البلد!!! شعب أغلبه سلم عقله لعبث وهراء الإعلام «إلا من رحم ربى»، الذى بث سمه أن ثورة يناير التى هى أعظم ما حدث فى تاريخ مصر «مؤامرة»، أغلب الشعب بكل أسف صدق التشويه الذى حدث لثوار يناير وأنهم خونة وعملاء للخارج بكلام جهلاء وما يزعمون أنها أدلة، وما هى إلى أشياء مضحكة. أيها الشباب اتركوا الناس تستمر فى ترديد بأن الثورة مؤامرة وأن الثوار خونة، اتركوهم يعيشوا فى غياب العدل واستمرار الفساد ويحتفلوا مع مبارك وأسرته، اتركوهم والتفتوا إلى مستقبلكم الدراسى والعلمى واستثمروا فى أنفسكم وحافظوا على شبابكم واوصلوا إلى أعلى مراتب العلم «اطلبوا العلم ولو فى الصين»، واوعوا تموتوا علشان أصحابكم مش هيعرفوا يجيبوا حقكم، علشان أهاليكم قلوبهم هتفضل موجوعة عليكم علشان مفيش قصاص فى الدنيا! اتركوا الشعب يفوق على مهله وياخد وقته وتذوب الغمامة من على عقله وعينه ويعرف هو وصل لفين بسكوته مرة أخرى، وتأكدوا أنها لن تطول هذه المرة! وخلوا الناس اللى مبسوطة دلوقتى تدور عليكم بعد ما تكونوا اتخرجتم وربنا وفقكم حتى فى حياتكم العلمية على الأقل، واعملوا على خلق البديل الجديد حتى لا نعيش فى دائرة مفرغة بين الإخوان وأيتام مبارك وتعلموا من أخطاء الماضى، ووقتها هتكون الدايرة دارت والكل جيه عليه الدور! والناس دى هى اللى هتتصدر الصفوف وهى اللى هتمد إيديها تدور عليكم علشان تبقوا وراهم بعد ما يفوقوا، وساعتها اعذروا منهم اللى كان خايف من إرهاب الإخوان ومن خطر داعش لأنه حقه يخاف، واعذروا منهم اللى فاق واعترف بخطئه وصدقوه. ده مش يأس صدقونى ده تعديل مسار، ده خوف عليكم وحرص على شبابكم فلا ترموا أنفسكم فى التهلكة، مش هنقدر نبص فى وشكم لما نقابلكم وإحنا مجبناش حقكم لو رحتوا مننا، مش هنقدر نعزى أهاليكم ونقولهم «لا نموت زيهم لا نجيب حقهم» لأنهم مش هيصدقونا تانى. العدل قادم لا محالة ولكن لا أعلم متى؟ يجوز أن لا يقدر لنا المولى عز وجل أن نراه فى الدنيا ولكن لا أحد يستطيع فى الآخرة أن يقول لله الواحد الأحد «هذه التهم أنكرها جميعا»!
