مع بداية شهر رمضان والزحام المتوقع فى الشوارع، بدأ شباب موقع التواصل الاجتماعى "الفيس بوك" تداول "وصايا السير على كوبرى أكتوبر"، الأكثر شهرة بازدحامه، وأطلقوا عليها اسم "قواعد كوبرى أكتوبر الأربعين". تتمثل أول قاعدة فى عدم محاولة صعود الكوبرى إلا فى الضرورة، أما "الحارة اللى جنبك مش بتتحرك أسرع منك.. بلاش تنقل بين الحارات" فكانت القاعدة الثانية والتى ينتقدون فيها انتقال العربات بين الحارات بحجة توصيلهم أسرع، وأكملوها بالقاعدة الثالثة "مافيش حاجة اسمها الحارة اللى فى النص أسرع". ولم ينته الشباب عن السخرية قائلين "لو عندك مشوار بدرى احجز مكانك من بليل"، والتأكيد على أفضل قاعدة هو ألا تصعد على الكوبرى، أما بالنسبة للعربات التى تحمل موديل قديم قالوا عنها "لو عربيتك 132 أو 128 أو أى موديل قبل 2001 أبوس ايدك مش لازم تعطل فوق خليك تحت فرص نجاتك أحسن". ولأنهم يتحدثون عن التواصل الاجتماعى، فنصحوا الشباب بالبحث عن شريكة الحياة أثناء وقفتهم على كوبرى أكتوبر قائلين "حاول تعمل علاقات مع اللى حواليك فى احتمال كبير تلاقى نصك التانى". وتتابعت القواعد "الوقت الوحيد اللى ممكن تستخدم فيه الكوبرى بأعلى كفاءة هو الساعة 4 الفجر"، "حاول تخلى كل حياتك فى مكان واحد واللى عايزك يجيلك بس ما تطلعش الكوبرى"، "عمرك ما تلاقى المطلع واقف.. الكوبرى عامل زى النداهة تطلع وتكتشف الكارثة فوق"، "رجوعك بظهرك عشان تهرب بعد ما تكتشف الكارثة غير أنه غباء فهو مش حل.. الأرواح الشريرة هتغضب عليك ومش بعيد تقضى اللى باقى من عمرك على الكوبرى"، "زحمة الكوبرى عاملة زى الرمال المتحركة كل لما تقاوم هتغرق أكتر.. استسلم وماتقاومش هاتوصل أسرع"، "ثبت علميا وبالدليل أن الكلاكس مش هايخليك توصل بسرعة"، "أى حد تعرفه بيطلع الكوبرى يوميًا ده يستحق السؤال عليه باستمرار لأنه هيبقى وصل لمرحلة من اللاوعى وفقدان الإحساس بالزمان والمكان"، "عشان ماتتعبش أعصابك ماتركزش مع يفط الإعلانات.. زمان كانت مليانة مزز دلوقتى مافيش"، "لو مصاحب واحدة ساكنة فى المهندسين وأنت ساكن فى مدينة نصر فركش معاها.. صدقنى ربنا مش هايبارك"، "السبع عربيات اللى واقفين بيغيروا الكاوتش للمزة ومنهم خمسة بس واقفين يسلوها، بما انكو معطلين الطريق كده كده على بعد عشرة متر قدام هاتلاقو أخوكو عربيته بتولع هاتبقى لفتة لطيفة لو حد حاول يطفيها معاه"، "الراجل الغلبان اللى بيشحت ده بيكسب فى اليوم قد مرتبك.. بلاش قلبك الحنين يخليك تقف وتعطل الناس عشان تديله الربع جنيه اللى ماكنتش عارف تخلص منه"، "عامل النظافة برضه شحات وشارى الطقم والمقشة ب120 جنيه ودافع خلو الحتة اللى واقف فيها وينطبق عليه القاعدة اللى فاتت"، "اللى صمم الكوبرى شخص سيكوباتى بيتلذذ بتعذيب الناس ماتطلعش الكوبرى وتديله الفرصة دى"، "ماتأمنش للكوبرى حتى لو فاضى دايما خلى عينك فى وسط رأسك.. اللى قدامك هايقف فى أى لحظة وأنت هاتخيش". وأخيرا القاعدة من 23 إلى 40 هى السرعة فوق الكوبرى "ما تحلمش بأسرع من كده".
