قبل ما تقرا الكلام ده عايزاك تقعد لثوانى قليلة.. تسرح.. تفتكر.. وتعد كام شخص قولت عليه الجملة دى "ظلمك اللى خلاك دكتور/ مهندس" سرحت؟ افتكرت؟ عديت؟ طلعوا كام؟ "ما تعدش يا جيمى" طيب أنتوا كأهالى تحبوا تبقوا ظلمة؟ تحبوا تظلموا ولادكم بإنكم تدخلوهم كليه هم مش عايزنها ومش حبينها ومش هيعرفوا يبدعوا فيها تحت شعارات "عايزين نطمن عليك قبل ما تموت" "إحنا أدرى بمصلحتك" "عايزين نأمنلك مستقبلك" "مش عايزينك تندم" "إحنا مش عايشينلك طول العمر" أو كلام وشعارات ما شابه ذلك والله الواحد مقدر الكلام ده كله ومقدر مدى خوفكم علينا ومقدر إنكم مش عايزنا نندم. بس أنتوا كأهالى, إيش عرفكم إن ابنكم مش هينجح فى المجال اللى عايز يدخلو؟ ليه تحكم عليه بالفشل؟ ليه تحبطوا؟ ليه النحس؟ ليه تربى فيه اليأس؟ ليه تقنعوه أنه عمره ما هينجح غير فى المجال اللى أنتوا مختارينوا له؟ ليه تتحكموا فيه؟ هو مش طين صلصال عشان تشكلوه على كيفكم! هو إنسان وله شخصية, و له كيانه الخاص به, وله ميوله, وله حياته, وله مستقبله, وله "الحرية" فى اختيار مصيره! ومش عشان أخوه الكبير دخل طب مثلاً, يبقى لازم برضوا تدخلوه طب تحت شعار "أخوك مش أحسن منك" هو مش حوار حد أحسن من حد, هو حوار كل واحد وله ميوله. ومش عشان أنتوا كنتوا عايزين تدخلوا كلية معينة وأهاليكم منعوكم، يبقى تحققوا حلمكم ده فى ولادكم, أو بمعنى أوضح وأصح تطلعوا عقدكم عليهم! أعزائى الآباء والأمهات, كفاكم عبث بمستقبلنا, أرجوكم يا أهالينا المستقبل لينا, ماتبقوش أنتوا والزمن علينا.