زينة قصيدة أنا برويها وقلبى بيتقطع على أهليها.. للى مش عارف مين زينة. زينة دى ضحكة فى وسط العيلة، زينة دى وردة فى قلب جنينة يمكن زينة أجمل ياسمينة. زينة دى صرخة فى قلبى وقلبك لما بنسأل راحت فين؟ مين اللى قتلها؟ وذنبها ايه؟ كانت حلم بينده بكرة فى وسط الليل لكن طلع الفجر عليها فضاع الحلم وماتت زينة. زينة دى حرقة قلبى وقلبك على أولادنا لما يلاقوا نفس مصيرها طول ما احنا راضين ساكتين على قوانين فى إيدينا تغيرها لكن بسكوتنا مقصرين. سايبين حق ولادنا يضيع سايبين قتلة زينة فى نعيم زينة يا دمعة فى عين الرحمة روحتى فى لحظة من غير رحمة.. هيفضل حزنى عليكى يا غالية طول ما الروح فى جسد قتلينك طول ما اللعبة بتاعتك نايمة جوة سريرك وانت يا زينة جوة القبر.. حقك كله علينا يا زينة ده مهما تكون العتمة شديدة مسير الفجر هيطلع يوم يخفى كل ملامح الضلمة ويجيب حقك من الظالمين.