اوعى تتكلم براحتك ولا تعلن عن صراحتك أو تقول إن الحكومه بسياستها قالقه راحتك أو تقول إن الرغيف عيش معفن مش نضيف إلا تبقى عدو بلدك والقانون يقطع رقبتك ...... اوعى تتكلم براحتك فى القصيده والمقاله او تقول عندك حلول للمجاعه والبطاله او تقول إن الوزير عايز الطلبه حمير الا تبقى من المعارضة يعنى موصوف بالعماله ...... اوعى تتكلم براحتك أو تجيب سيرة الرئيس من بعيد أو من قريب خلى اسلوبك حسيس الا هايقولوا اهانه يعنى كُفر بالديانه يعنى مُرتد وسيادتك راح تروح فيها فطيس ...... اوعى تتكلم براحتك أو تقول إن الوزير خد فلوس التأمينات حط مليارات فى بير أو تجيب سيرة الأراضى اللى مزروع واللى فاضى أو تقول الغاز وغيره الكلام ده كلام كبير ...... اوعى تتكلم براحتك عن هروب المليارات او تجيب سيرة (مارينا) و(شرم) وبقيت الحاجات او تقول عن (عز) بيه أنت اهبل ولا أيه؟ شوف صحابه يبقوا مين واحمى نفسك بالسكات ...... اوعى تتكلم براحتك او تربى حتى دقنك ولا تعمل فيها مسلم والقانون ينظر فى شأنك يعنى حاول باختصار تعرف الكيف والقمار والكلام دا تخده منى حطه حلقه جوه ودنك ...... اوعى تتكلم براحتك عن بلاوى الانتخاب أو تجيب سيرة فُلان اللى حاضر واللى غاب أو تقول إن القانون فيه كلبشات السجون وابن عمك حط صوته وهو ميت فى التراب ...... اوعى تتكلم براحتك او تقول فين الصحافه روح ودور شوفها فين هاتلاقيها فى القرافه واللى فاضل كلمتين عند مجدى احمد حسين لما قالهم قالوا كافر قالوا مؤمن بالخرافه ....... اوعى تتكلم براحتك عن شئون العبارات أو تقول فيه الف واحد من الغلابه فيها مات آو تقول (ممدوح) فى لندن قال هناك العيشه ملبن والمراكب عنده ماشيه والمكاسب مليارات ....... اوعى تتكلم براحتك فى الطوارىء والقانون القانون دا كلمه واسعه جامعه من كل الفنون هى يعنى بأختصار فيها جنه وفيها نار فيها اللى يحط اهلك خلف اسوار السجون ...... اوعى تتكلم براحتك روح وربى العيلين اوعى تسأل عن حقوقك او تقول أنا صوتى فين أو تقول انا دمى سال يوم عبورنا للقنال القنال دى يادوب تكفى الوزارة أسبوعين ...... اوعى تتكلم براحتك عيش غريب خليك فى حالك وانسى انك مصرى احسن راح تلاقى الضغط جالك وانت عندك المراره من الحكومه والوزاره واشكى حالك للى خلقك ياخد اللى بالى بالك ......
