أيام بقت صعبة وإحساس بالألم عايشين فى غربة وإحنا جوه الوطن الدنيا وخدانا قوى من بعض ولا حد عاد حاسس بأوجاع حد الأخ بايع أخوه ولا مرة فكر فيه ماله وعياله نسوه حق الأخوه عليه وأختك ولا حاسة باللى مبكى عنيك وفى شدتك تنسى بكلمتين تواسيك والصاحب المجدع راح زى غيره ما راح ولا حد ليك يسمع ولا يداوى جراح ياريت تعود تانى لمة ليالى زمان دى الضحكة وحشانى فى قاعدة الجدعان والشاى على الراكية ساعة العصارى مزاج والقاعدة ع الساقية دوا للعليل وعلاج