أنا المواطن المصري (هيثم نبيل) أتقدم للمرة الأولى لرئيس مصر الحالي والعاشرة تقريبا لكل من حكمو مصر خلال العشر سنوات الماضية.. أنا عايز حقي. حقي في إيه بقى؟ حقي إني أعرف يا فندم مين اللي قتل (جمهور) رايح يشجع فريقه في محافظة مصرية أثناء مباراة في بطولة مصرية؟. حقي أعرف يا ريس هو ليه لم يتم محاسبة أي أحد من المسئولين عن النادي المنظم لهذه المباراة حتى الآن؟ وليه يا ريس محدش طلع قال لنا لحد دلوقتي هل الموضوع كله كان (حادثة) ولا كان موضوع مدبر .. ولا كان ايه بالظبط ؟؟. سيادتك يا ريس في اخر لقاء ليك قلت (إذا أخطأ شخص في مؤسسة ما يجب محاسبته وهذا لا يعني إسقاط المؤسسة كلها) والمصحف أنا مقتنع بكلام حضرتك ولو سمحت عايز سيادتك تنفذه على كل القيادات التي أخطأت في مذبحة بورسعيد (مع الاعتراف أن هذا لن يسقط أي مؤسسة تتم إدانتها) اه والمصحف!. عايز حقي يا ريس .. عايز اعرف هو ليه الكورة عندنا بتدار بهذا الشكل وبهذه التربيطات وليه الرياضة المصرية في النازل على طول ! انا عايز حقي يا ريس .. عايز اروح ملعب الكرة علشان اتفرج على الماتش من غير ما يحصل حاجة تخليني اكره الماتش والبلد والشرطة والشعب والفريق التاني !! عايز حقي يا ريس .. عايز اعرف مين اللي بيقتل ولادنا في كل مكان في مصر حاليا ؟؟ وعايز اعرف هو احنا ساكتين عليهم ليه (ومعلش سيبك من فكرة انهم كلهم اخوان ديه) علشان مش كلهم .. لا ده فيه ناس تانية كتير يا فندم (احنا بقينا ملطشة يا باشا) !! عايز حقي يا ريس .. انا عايز اعرف هو سيناء ديه موقفها ايه مننا بالظبط ؟؟ بصراحة يا ريس .. نفسي اشوف فريق (بيمثل محافظة سيناء) حتى لو حيلعب مباريات ودية مع فرق الدوري الممتاز (ويبقى بقرار) سيبك من نظام الكورة اللي عندنا ده .. احنا اصلا ما عندناش نظام ؟ انا عايز اعرف يا ريس هو احنا حنفضل عايشين كأننا بنلعب في الوقت الضايع كده كتير ؟ اقولك يا ريس : انا عايز اعيش .. عايز اتفرج على كورة .. عايز اكل اكل نظيف .. عايز اشرب مية نظيفة .. عايز اعرف أي نظام تدار بيه ( الكورة ) خلينا في الكورة ! ..عايز افهم هو الماتش ده حينتهي أمتى ؟؟ ... اجبلك من الآخر يا ريس ..... انا عايز حقي .. اني اشارك في الماتش ده .. مش عايز اتفرج عليه بس .. علشان لو احنا لم نشترك فيه ... الماتش ده حيبوظ يا ريس !!!!!
