جلس كنباوي أمس الجمعة وبجواره كنباوية امام شاشة التليفزيون يتابعان الموقف السائد في جمعة الغضب التي أعلنها الإخوان عقب فض اعتصامي رابعة والنهضة ، ويريان مايحدث في موقعة رمسيس بين انصار المعزول مرسي لا أرجعه أو أكسبه الله وبين قوات الشرطة والجيش وهما في حالة اندهاش واستنكار واستنفار مما يفعله الإخوان في البلد من حرائق وقتل وخراب ودمار. كنباوية: شوفت الخونة الاندال اللي لا ملة لهم ولا دين بيعملوا ايه ؟ كنباوي: انت كنتي مستنية ايه من مجانين السلطة .. دول يرشونا بالورد والفل والياسمين بعد فض الاعتصام .. لازم كانوا يعملوا كده لأنهم اغبياء مجانين متخلفين كنباوية: دول بيحرقوا البلد وبيقتلوا رجال الشرطة والجيش كنباوي: ياكنباوية هما مش طايقين الجيش والشرطة والود ودهم يبيدوهم دول بكرة .. يعملوا عمليات انتحارية واغتيالات كمان لشخصيات هامة مش حيسكتوا كنباوية: والجيش حيحط إيده جنبه ويقعد يتفرج ؟ كنباوي: لأ طبعا الجيش مش حيقف يتفرج حيتصرف معاهم بس بعد مؤتمر الرئاسة بكرة اللي حنوري فيه للعالم الإخوان عملوا ايه في مصر الجيش والشرطة.. حيدكوهم دك كنباوية: فكرك كده ياكنباوي ؟ كنباوي: ايوة ياكنباوية الجيش مش سهل ودول راحوا أو جم قلة رغم اللي انتي شيفاه ده همه مليون واحنا فوق ال 85 مليون مش حيغلبونا ابدا مهما حصل.. لأننا على حق وهمه على باطل .. وعلي فكرة همه متعودين على العنف ده من زمان من ايام أحمد الخازندار القاضي اللي حكم على مجموعة شباب رموا قنبلة على بار في عماد الدين كان فيه شويه انجليز مات منهم كام واحد .. لما جه القاضي وحكم عليهم بالسجن من سبع سنوات لعشر سنوات طلع المحامي الإخواني وقال للقاضي ياسيادة القاضي دول شويه شباب ثوري متحمس عايز جلاء الانجليز عن مصر.. رد عليه القاضي وقال له القنبلة والكام عيل دول همه اللي حيخلوا الانجليز يسيبوا مصر .. احنا بينا وبين الانجليز معاهده لازم نحترمها.. ماعجبش الإخوان كلام أحمد الخازندار القاضي قاموا اغتالوه دول ولاد شياطين خونة سفاحين قتالين ماتستغربيش بقي من اللي عملوه النهاردة وحيعملوه الأيام الجاية كنباوية: عرفت الكلام ده منين ياكنباوي ؟ كنباوي: قريت تاريخهم الاسود من يوم ما مرسي مسك الحكم وعرفت عنهم بلاوي سودة علشان كده عمري ماكنت مرتاح لمرسي كنباويه: بس انا عمري ماشوفتك بتقري كتاب هنا في البيت كنباوي: في الشغل فيه مكتبة باخد منها كتب اقراها في وقت الفراغ وبرجعها تاني واللي شجعني على كده اهتمامك بالسياسة من ايام 25 يناير كنباوية: اهه انت كده بتكملني ياكنباوي كنباوي: ماهو ده اللي حنسيبه لولادنا بعد كده ربنا يحرسهم ويحميهم كنباوية: بس الحكومة متراخية اوي ومش على مستوي الاحداث.. علشان كده الإخوان مش خايفين وبينزلوا الشوارع بالسلاح.. لو اللي بيحصل ده حصل في بلد تانية كانت حكومة البلد دي عدمت المتظاهرين دول في ميدان عام علشان يكونوا عبرة لمن يعتبر كنباوي: انا عارف إن حكومة الببلاوي دي حكومه متراخية بس الظروف اللي تم فيها اختيار الوزارة كانت ظروف صعبة للغاية والحكومة الجاية حتكون افضل بكتير بإذن الله كنباوية: بس انا زهقت وعايزة حل جذري عايزة انام واصحي ألاقي الإخوان مالهمش وجود كنباوي: الحكاية مش قفش كل حاجه بتيجي بالتدريج واحدة واحدة الصبر طيب. كنباوية: ومنين نجيب صبر تاني انا نفسي البلد ترجع زي زمان.. نفسي اتمشي معاك على الكورنيش وانا مش خايفة.. نفسي انزل السيدة زينب أو الحسين واشم هوا نضيف مافيهوش إرهاب كنباوي: حيحصل ياكنباوية ومصر حترجع زي الأول واحسن شوية والصابرين بخير كنباوية: طيب والبلتاجي حيبقضوا عليه ؟ كنباوي: ايوه حيقبضوا عليه الأمن الوطني مش ساكت كلها ايام ويتم القبض على البلتاجي وحجازي وباقي العصابة الدولية دول كنباوية: يارب ياكنباوي يارب كنباوي: حيحصل وياريت انتي تطمني والحال حيبقي بخير إن شاء الله بس انتي قولي آمين كنباوية: آمين يارب آمين كنباوي: يلا بقي غدينا ولا مش ناوية ؟ كنباوية: لأ ناوية طبعا دقايق والاكل حيكون جاهز كنباوي: آه والنبي اصلي جعان اوي كنباوية: سلامتك من الجوع دقايق ياعيوني والاكل حيكون قدامك كنباوي: ربنا مايحرمني منك كنباوية: ولا يحرمني منك ياغالى !
