قال الفنان علاء زينهم: "كنت شغال شيف في مطعم والمخرج الكبير عاطف سالم كان بيصور فيلم قاهر الظلام عن قصة طه حسين وكان بيشرب القهوة الصبح عندنا في المطعم وصاحب المطعم قال له إني بمثل في مراكز الشباب وقصور الثقافة وقال له هيعمل دور معايا قريب وفعلا بعت لي". مهنة علاء زينهم في العراق وأضاف زينهم خلال لقائه مع الإعلامي عمرو الليثي ببرنامجه واحد من الناس على قناة "الحياة": "مريت بالعديد من الظروف الصعبة والتحديات ومنها اشتغلت فى العراق سواق، ولما حصلت الحرب رجعت وأنا بحب السواقة جدًّا، وهوايتي بعد التمثيل السواقة، وأنا كنت هاوي مسرح ولما شُفت المسرح الوطني في بغداد كنت بلف حوله ونفسي أمثل فيه يوم، وربنا كتبها لي اشتغلت مع سعيد صالح وعادل إمام على هذا المسرح. علاء زينهم سائق التاكسي وممثل المسرح مع عادل إمام وتابع: "لما رجعت من العراق كنت بشتغل في شركة تأمين في وسط البلد وكان معايا تاكسي أسود بعداد أشتغل عليه قبل وبعد الشغل، حتى أستطيع أن أكون نفسي وأتجوز، وكنت بشتغل مع الزعيم عادل إمام في المسرح وبروح بالتاكسي، والزعيم كان عارف إني بشتغل على التاكسي".
علاء زينهم يكشف كواليس دوره بمسرحية الزعيم ومشهد سقوط البنطلون وقال الفنان علاء زينهم: "ذهبت للمخرج حسن عبد السلام علشان يشغل واحد صاحبي اسمه عربي وأنا مروح أنا وهو الزعيم عادل إمام كان بيعمل بروفات في مسرح "ليسيه الحرية" وقلت لصديقي يا سلام ربنا يكرمنا ونشتغل مع الزعيم عادل إمام، وبالفعل لاقيت واحد صاحبي بيقول لي تعالَ بكرة تعمل مقابلة مع عادل إمام علشان تشتغل معاه في مسرحية الزعيم". وأضاف: "افتكرته بيهذر لحد ما رُحت وفعلًا قابلت الأستاذ عادل وقعد يهذر معايا وطبطب على كتفي وكنت ماسك كوباية شاي بتغلي لم أحس بسخونتها وأنا بكلمه وكنت بخرج على النص معاه وكان بيضحك ويثبت الإفيه في المسرحية". ومن كواليس العمل بمسرحية الزعيم، تابع: "كان هناك مشهد المفروض البنطلون بيسقط لكنه لم يسقط ووجدت الجمهور يضحك فطلب مني الزعيم أن أقدم ذلك المشهد يوميًّا بهذه الطريقة، فعلًا العمل مع عادل إمام هو متعة وقيمة كبيرة وهو الأفضل بالتأكيد وحلم كل فنان العمل معه".
علاء زينهم: رفضت أتضرب قلم من سيد زيان ورفضت دور متحرش مع إيناس الدغيدي ولفت الفنان علاء زينهم: "بحلم أعود مرة أخرى أسوق عربية نقل تاني وأسافر البحر الأحمر، وأنا بحب الشغل الحلال وبربي ولادي على كدا". و أضاف: "للأسف بقيت ما عنديش وقت للسواقة لأني كنت في أفخم فاترينة مع النجم عادل إمام، فكان المخرجين يشاهدوني بالليل في المسرح "الزعيم" وتاني يوم ألاقيهم بيبعتوا لي أدوار".
ولفت: "من الأعمال التي أحبها النوم في العسل، والماء والخضرة والوجه الحسن، ويتربى في عزه، وونوس، والبرنس".
وتابع: "علاء رحمي كان بيقول لي طول ما أنا عايش أنت معايا في بوجي وطمطم، حتى بعد وفاته ابنه عمل بوجي وطمطم تاني وأخدني معاه".
وعن خلافه مع الفنان سيد زيان قال: "كنت أمثل في مسرحية "العسكري الأخضر" وكان هناك مشهد المفروض إنه بيضربني فيه بالقلم وأنا رفضت، وتحدثت مع سيد زيان لو ضربتني هضربك وبعدها رفضوا استمراري وقلت ليهم ده آخر يوم ليَّ معاكم، واتقابلنا بعد كدا وقال لي لسه خايف مني ومش عاوز تشتغل معايا واتصالحنا".
ولفت: "هاني لاشين فى مسلسل زعل مني لأني رفضت أضرب ابني وأنا مش بحب أضرب حد أو أتضرب، وأحمد زاهر لم يضربني في مسلسل البرنس، ومحمد سامي الله يكرمه أخد لي شوطات من زوايا مختلفة أعطت إحساس بالقلم وستات في الشارع كانت تقابلني تقول لي إزاي يضربك كده وأحلف لهم إن دا تمثيل".
وأشار: "الدكتور يحيى الفخراني الله يكرمه قال لي ما تمثلش زى ما قال لك أحمد صقر خليك بطبيعتك، في مسلسل زيزينيا الناس هتحبك وفعلًا كان هناك رد فعل حلو أوي من الناس".
وأكد: "رفضت دور متحرش مع المخرجة إيناس الدغيدي واتناقشت معاها لمدة ساعة ونصف وبالغت جدًّا في الأجر علشان ترفض تاخدني ولما اتناقشت مع أولادي قالوا لي يا بابا اوعَ تعمل الدور دا الناس بتقابلك في الشارع هتقولك إيه".
أمنية علاء زينهم التي لم تتحقق ولفت: "الفنان علاء زينهم أنه أخد جائزة واحدة في حياته عن فيلم "الماء والخضرة والوجه الحسن "، وكان الدور دا هيعمله الفنان صلاح عبد الله لكنه كان مريض. واضاف: "اتصلت بالفنان صلاح عبد الله وقتها أستأذنه قال لي في ناس أصيلة زيك بتسأل، وأعطاني نصايح وقال لي الدور دا حلو أوي ركز مع المخرج يسري نصر الله عنده فكر مختلف. 78 عاما على ميلاد الفنان نجاح الموجي، رمز التلقائية والارتجال على المسرح وصاحب أشهر الإفيهات الفنان أحمد عز يحضر لعمل سينمائي جديد مع صلاح الجهيني و تابع: "كان نفسي أشتغل مع أحمد زكي لكن ربنا عوضني بإني اشتغلت مع هيثم ابنه، ونفسي أشتغل مع ياسر جلال لأني اشتغلت معاه في يتربى في عزو وكنت واخد عنه فكره إنه رخم ومش جدع لكني لاقيته غير كده وإني كنت ظالمه، وقُلت ليه أنا كنت ظالمك".
وأشار: "أستاذ صلاح السقا صاحب فضل عليَّ وهو اللي كان سبب إني آخد عضوية النقابة، وكانوا رافضين لأني شغال موظف، وكنت قاعد مع سليمان عيد على القهوة، وكان أحمد السقا جاي ياخده بالعربية، وسليمان قال لي ما تكلمه فقلت ليه أنا ما أعرفوش قال لي كلمه بس هو بيحبك، وفعلًا خرجت وسلم عليَّ كأنه يعرفني من سنين وقُلت ليه على موضوع العضوية فأعطاني رقم تليفون البيت وقال لي كلم بابا هو بيحبك وبيشوفك، وفعلًا كلمته على طول من تليفون القهوة، وأول ما قُلت ليه أنا علاء زينهم قال لي ازيك ياد عامل إيه وحكيت ليه مشكلتي قال لي خلاص اعتبره خلص، وفعلًا تاني يوم كلمني وعمل لي الكارنيه ومضَّى الناس اللي كانت رافضة عضويتي ومش ممكن أنسى فضله عليَّ".
ونقدم لكم من خلال موقع (فيتو)، تغطية ورصدًا مستمرًّا على مدار ال 24 ساعة ل أسعار الذهب، أسعار اللحوم ، أسعار الدولار ، أسعار اليورو ، أسعار العملات ، أخبار الرياضة ، أخبار مصر، أخبار اقتصاد ، أخبار المحافظات ، أخبار السياسة، أخبار الحوادث ، ويقوم فريقنا بمتابعة حصرية لجميع الدوريات العالمية مثل الدوري الإنجليزي ، الدوري الإيطالي ، الدوري المصري، دوري أبطال أوروبا ، دوري أبطال أفريقيا ، دوري أبطال آسيا ، والأحداث الهامة و السياسة الخارجية والداخلية بالإضافة للنقل الحصري ل أخبار الفن والعديد من الأنشطة الثقافية والأدبية.
