بكى نهر النيل بجميع روافده على هذه السدود التى عطلت حركته الطبيعية وحجزت مياهه عن بعضها بكى النيل لأن روافده تستهلك طاقته الكبرى ومجراه الرئيسى .. ولذلك قرر أن يعقد جلسة طارئة جمعت بين الأخين السدين النهضة الإثيوبى .. والسد العالى. السد العالى: إيه ياعم النهضة هى المشرحة ناقصة نهضة؟ النهضة: ياعم السدود مش كده. أنا لسه فى اللفة وأنت الخبرة وبعدين هو حلو لحضرتك .. وحرام عليا. السد العالى: بلاش لوع يا إثيوبى وخليك دوغرى! النهضة: ماشى ياعالى بلاش أعمل شوية كهربا لأهل بلدي وأبيع لغيري وأعملي قرشين ما أنت عارف العملية ناشفة عندنا. العالى: حقك .. وربنا يرزقك ويرزقنا.. لكن مش معقول عشان تفتحها عندك.. تقفلها علينا. النهضة: لامؤاخذة أنت سد قديم وعارف أن شغلتى حجز الميه عشان الكهربا.. ولا حضرتك بتكلمنى على أنى «خلاط» العالى: مقبول منك يا خفيف.. أنت عارف قصدى كويس مش معقول عشان تنورها عندك تضلمها علينا هنا! النهضة: إحنا أولاد كار واحد ياحلو ياأسمر العالى: الحلو الأسمر .. زعلان.. من اللى بيحصل فيه.. النهضة: قصدك عبدالحليم حافظ! العالى: لا يافلحوص.. قصدى على نهر النيل اللى ممكن يزعلنا من بعض! النهضة: ربنا ما يجيب زعل وكل شىء بالتفاهم.. وبعدين إحنا معانا شركاء تانيين.. يعنى مش أنا وأنت بس. العالى: هو ده مربط الفرس.. يبقى تحترم الاتفاقيات القديمة.. ولا أنت مع الجماعة بتوع الحوض عملتوا غيرها فى عنتيبي من ورا ضهرى. النهضة: لا مؤاخذة.. كل شىء كان فى النور.. والناس بتوعك هما اللى غابوا.. وقلنا لهم بيكم ومن غيركم الاتفاقية هتمشى.. يبقى أحسن تتم بالتراضى لكن يظهر سيادتك ياعالى.. غاوى تكلمنا على أننا تلامذة وأنت الأستاذ أو زى ما بتقولوا فى مصر عندكم عامل علينا فرود!. العالى: طيب انسى اللى فات واحنا أولاد النهاردة ياكل معاك الكلام ده! النهضة: حلو .. وإيه المطلوب منى أدفن نفسى بالحياة! العالى: لا يابرنس إحنا بإذن الله هندفنه سوا!! النهضة: هو مين؟ السد العالى: اللى لعب عليك «بالعبرى» وفهمك إنك تعمل اللى عايزه وإحنا نضرب دماغنا فى الحيط. النهضة: ياريتنى لقيت حد لعب فى دماغي «بالعربى» وأنا كنت رميت «العبرى» فى النيل!!. [email protected]
