شوفت ياد يا «سُمعة» اللى حصل في السياحة؟! دى السياحة انتعشت ياولا.. دا مشاهير العالم بييجوا عندنا واحد ورا التانى أهون.. شفتش يا سُمعة الراجل أطول واحد في العالم والست القزمة أقصر واحدة في العالم وهما متصورين عند الأهرامات؟! آه شفت ومصر كلها شافت. يااااااااا دهوتى السودة يانى يابا.. يا داهية دقى.. دا أنا بكلم نفسى.. ولا أكونش بكلم بُقي؟! طب هو إيه بقى علاقة دا بتنشيط السياحة يا أبو الشلاضيم؟! يعنى هي كدا السياحة انتعشت والمشكلة خلصت؟! طب قولى يا بُقي.. فيه كام مرشد سياحى من المليون العاطلين اشتغل؟!.. مافيش طب كام دولار أو أي عملة صعبة دخلت مصر؟!.. ماااافيش. هق هق هق.. بتضحك يا ابن العبيطة؟!.. لا يا خويا.. أنا يتيم وخاطب عذراء الربيع وشارب من كاس العذاب ومش ناقص. يوه.. دا أنا لسه بكلم نفسى.. أنا وقعت ولا الهوى رمانى! دى السياحة في مصر كانت زى شجرة الموز اللى بتطرح لوز.. مش مجرد ضيوف زى اللى انا بقول عليهم.. واللى بيتصوروا عند الأهرامات وبنصرف عليهم فلوس. لأ بقى.. دى السياحة بتجيب فلوس.. وأنا بفهم بتاع هيئة تنشيط السياحة من "غمزتو".. زى مابفهم الحصان بتاعنا من "رفستو". موظف الهيئة عايز يقولنا إنه شغال أهه.. والميزانية بتتصرف في مكانها.. لكنه ما قالش للسايح اللى بره إننا عندنا أمان والسياحة مستنياك. الموظف بيصور الضيوف من لعيبة الكورة والممثلين الأجانب وأقصر ست وأطول راجل في العالم وينشرها على صفحته بفيس بوك ويوزعها على كام قناة محلية وكام جرنال وموقع مصرى للأسف. يعنى بدلا من أنه يخاطب دول العالم بره ويبعتلهم الصور دى ويعمل لقاءات في قنوات تليفزيونية عالمية تلاقى عمنا مسئول الهيئة ضيف ببرنامج على قناة داخلية ملهاش أي ستين لأزمة وبيفرجنا على صور ضيوف الهيئة.. ولما نسأله عن دخل وزارة السياحة من وراء كل هذه الملايين اللى بيصرفوها على الضيوف تلاقيه يقولك "فتشنى فّتش.. تكونش عايز تفتشنى ولا إيه.. لا والنبى فتشنى فتش". ونعم الأخلاق الكريمة.. ونعم السجاية القويمة.. الناس دى لازم تترقى لواءات في فرقة حسب الله وتسيب السياحة فورا.. ويلا بقا.. سلامو عليكووووووووووووو!
