كلمتين هتحاسب عليهم أمام الله وأنا عيشت في بلادنا العربية عدد من الدول الأوروبية وخلصت بنتيجة واحدة وهى أن الشعوب والحكومات ما هي إلا فرز لبعضهم البعض..النجاح إرادة شعب تم صياغة إرادته في شكل قوانين ومشاريع حكومات نابعة منه. وهناك دول أخرى لعب الحظ دورا مهما معها إما بحكومة قوية أو استعمار أو ملوك استطاعت أن تحدث طفرة واستطاعت توظيف الشعب بشكل جيد، لكن للأسف الشديد أصبحنا نحن شعب الحقوق المكتسبة.. عايزين ناخد وإحنا إنتاجنا ضعيف عايزين حكومة شاطرة وصاحبة رؤية تجيبلنا المرتب بلا عمل..عايزين حكومات صالحة وإحنا فاسدين.. عايزين بنزين رخيص وعايزين دواء رخيص وعايزين طرق وكباري وعايزين إصلاح وعايزين غذاء وعايزين حكومة تكون حكومة وشعب هي تحط قوانين وهي تحط رؤية وتشتغل بالمرة وإحنا هاهنا قاعدون وعلى فكرة كلامي مش دفاع عن حكومة الله أعلم بيها.. إحنا شعب تعود على الشكوى.. تعود يقيم غيره وينسى تقييم نفسه وإنتاجه وإتقانه وضميره.. مفيش شك أن العالم حولنا مش مثالي وفي حروب قريبة وفتن على الحدود ومفيش شك أن المرحلة بحلوها ومرها والظروف كلها بتقول لازم نكمل واللي شايف حل تاني مناسب بس يكون أمني واقتصادي وسياسي عملي وواقعي يقوله... وأخيرًا الناس اللي بتسهر في أركان وساحل والتجمع وغيرها من أماكن بتشرب حاجتين بتدفع 200 جنيه وده أقل واجب ولو مون عربيته ببنزين غالي شوية يشتم ويسب في الحكومة!! الناس اللي بتكسب دهب من تركين السيارات ولو جبتله شغل تاني هيرفض لأن البارك فلوسه أكتر بكتير.. في ناس بتبيع مناديل في الإشارات المرورية بس لو قولتلها اشتغلي تقولك لا لا الإشارة بزنس قوي واسال أي واحد.. كم واحد مش لاقي سائق أمين كم واحد عمل مشروع وفشل لأنه مش واقف بنفسه فيه لأننا ماشين بسياسة صاحب المحل لو مش موجود باظت.. شطب شقتك وهات أغلى صنايعي وشوف هيحصل إيه وإنت مش واقف بنفسك! وأخيرا الناس المتدينة اللي ما تعرفش تشتم غير بسب الدين دى حكاية لوحدها.. وبالنسبة للحكومة اللي بتحاول تصلح مالقتش حلول للمحترمين والغلابة والشرفاء من الشعب يبقى تتحمل أمام العزيز الجبار الكارثة دنيا وآخرة.. ملحوظة كلامي ليس للتعميم وأكيد حضراتكم عارفين الصفات اللي كتبتها تشمل كم في المائة منا نحن أبناء هذا الشعب، وعلى أي حال علشان المشككين في النوايا، كلامي لا يشمل الغلابة والشرفاء اللي أحذيتهم تاج على رأس كل فاسد في هذا الوطن وأقول لهم لكم الله وكفى بالله وكيلا. وأقول للحكومة والشعب معًا «يا نعيش عيشة فل يا نموت إحنا الكل».
