الدكتور خالد حنفى، وزير التموين المستقيل.. أنا أحبه لله في لله كده ماعرفش ليه.. جايز علشان هو الوزير الوحيد اللى كان بيضحكنى بتصريحاته العنترية.. بداية من تصريح «مافيش مصرى مش هياكل لحمة» وصولا إلى تصريح «الفرخة هتبقى ب 75 قرشا على بطاقات التموين» مرورا بتصريح «وجبة ديليفرى لكل مواطن». طب أنا بحبه علشان بيضحكنى.. لكن الحكومة والإعلام والنواب بيحبوه ليه بقى وهو فيه كل العبر اللى طلعت عليه بعد الاستقالة؟! أنا ماعرفش. علشان كده قررت أن ألتقى الرجل لأسأله عن سبب تقديم استقالته في الوقت ده بالذات.. ولأن الراجل تليفونه مغلق ومابيردش على أي حد.. أنا جبت من الآخر ورحتله فندق سميراميس. استقبلنى الرجل بترحاب شديد وقال لى وحشتينى ياست الكل قلت: إيه يا معالى الوزير.. هو انت مالكش بيت تتلم فيه بدلا من قعدة الفنادق دى؟! قال: أنا كده بحب استايل الفنادق ياسطوطة هانم لأنه يلهمنى بأفكار جديدة قلت: طبعا ياعم الله يسهله.. بس بعد ترك الوزارة هتبقى تكاليف الفندق عالية على معاليك قال: أنا أسكن هنا من مالى الخاص يا هانم وماحدش له عندى حاجة قلت: علشان كده انت كنت حاسس بالمواطن الغلبان.. ده حتى الفرخة في عهدك وصل سعرها ل 75 قرشا.. والوجبات الديليفرى نازلة ترف على بطاقات التموين! قال: آه.. اإتى كده بتتريقى ياست سطوطة.. صح ؟! قلت: أنا كنت عايزة أعرف سبب تقديمك الاستقالة في هذا الوقت بالذات قال: ما هي الجرايد والمواقع وبرامج التوك شو قالت كل حاجة وزيادة ياستنا قلت: عيب عليك ده أنا سطوطة الفنجرى.. يلا قول قال: بس مش للنشر قلت سرك في بير.. ها.. قول قال: النواب عايزين يعملوا نفسهم أبطال على قفايا.. علشان كدا أنا قدمت استقالتى قلت: مش فاهمة قال: شوفى ياست الكل.. أنا كل الهرى اللى بيتقال دا مايهمنيش وموقفى سليم 100%.. والدليل أن رئيس الحكومة كان يشيد بنشاطى في كل مؤتمراته الصحفية.. لكن القصة وما فيها أن بعض نواب البرلمان عايزين يحققوا بطولات زائفة على حسابى وفوجئت بالعديد من الاستجوابات وطلبات الإحاطة والأسئلة تنتظرنى ليثبتوا للشعب أنهم قال يعنى بيأدوا دورهم الرقابى.. فقررت أن أحرمهم من هذا الحدث علشان يفضلوا كده مفضوحين قدام الشعب فقدمت استقالتى قبل تحديد موعد ذهابى للبرلمان قلت: لكن النواب بالفعل فضحوا المسكوت عنه في شون وصوامع القمح قال: وبعدين عملوا إيه بقى.. تصالحوا مع المخالفين مقابل غرامات قلت: أمال انت كنت عايزهم يعملوا إيه ؟! قال: يقدموا الفاسدين للمحاكمة قلت: أهم هيسجنوك أنت ياغالى قال: في المشمش.. أنا قدمت استقالتى وبكده البرلمان مالوش صفة قانونية ليتعامل معى أصلا! قلت: أصلا؟! قال: أيوه أصلا!