اعتبر عبد المنصف أفندى أن عبد العظيم أفندى رجل منحوس إذ سنحت فرص كثيرة لمقابلة رئيس الحكومة للإعلان عن تفاصيل المشروع المصرى لغزو الفضاء لكن تم تأجيلها بسبب ظروف مرت بها البلاد وكان آخرها ارتفاع سعر الدولار ليتخطى حاجز التسعة جنيهات وهو ما جعل رئيس الحكومة يتفرغ لحل هذه الأزمة وهو ما فسره عبد العظيم أفندى بأنها أقدام.. *** الشيخ نعيم: ماكنش العشم خالص يا عبد العظيم أفندى تبعنى البيعة دي.. بقى أنا تقول على إنى دجال ومشعوذ وبتاع تلت ورقات لكن علشان ربنا مبيرضاش بالظلم طلعت براءة من النيابة لعدم ثبوت الادلة وجتلك وأنا واخد على خاطرى منك علشان أقولك أنى مسامحك لأنى عارف أنك عملت كدا مضطر وخايف على سمعتك وسمعة المشروع الفضائى مني.. عبد العظيم: طب لما أنت عارف كدا جيت هنا ليه تانى وأنت العين عليك وتلاقى البوليس دولقتى مراقبك وكلنا هنروح في ستين داهية.. الشيخ نعيم: إيه يا عبد العظيم أفندى أنت محسسنى إنى تاجر في الصنف ولا زعيم عصابة الموضوع خلص خلاص وتقدر تقول عليه إنه كان سوء تفاهم مش أكتر ناس العمل بتاعى معملش معاهم نتيجة دا مش علشان العمل وحش لا سمح الله لكن علشان طالعهم هما اللى شمال فالعمل معملش حاجة قاموا بلغوا عني.. عبد العظيم: دا على كدا كان لازم اسلمك بأيدى للنيابة من زمان يا راجل أنت معانا بقالك شهور مشفتلكش بركة واحدة من البركات اللى بتشيعها عن نفسك رغم إن كل طلباتك مجابة.. الشيخ نعيم: أنت بتنكر الحقايق يا عبد العظيم أفندى فاكر لما قللتك إن الحكومة دى هتفضل في مشكلات وهتخرج من نقرة تقع في دحديرة علشان مرضوش ياخدوك فيها وزير وأهو على يدك كل يوم في حاجة قارفة الحكومة ومعكننة عليها عيشتها ودا طبعا مش صدفة لا دا كان من عمايلى أنا وتعزيمى على الحكومة دي.. يدخل زكى أفندى وينظر بغضب للشيخ نعيم الذي يضطر للخروج تجنبًا للصدام معه زكي: تانى يا عبد العظيم أفندى هترجع للنصاب دا.. دا مشعوذ ودجال إزاى يدخل محراب علم زى اللى إحنا فيه.. مشروعنا الفضائى مش هينجج بالبخور وكرامات الراجل دا.. عبد العظيم: الغرقان بيتعلق بقشاية يا زكى أفندي.. ثم إن الراجل في جزء من كلامه صح.. زكي: مفيش فايدة فيك يا عبد العظيم أفندى سلمتله دماغك فعملها زى الكورة يشوطك يمين ويشوطك شمال وأنت مطاوعه ومش مقدر متاعب الراجل الكبير علشان المشروع دا ينجح ويشوف النور وتشوف أنت من بعده المجد والشهرة.. عبد العظيم: أنت بتضحك على ولا بتضحك على نفسك يا راجل أنا بقالى شهور عايز أقابله علشان نحط خطة للكشف عن مسار المشروع دا وهو على طول مشغول مرة ببيان الحكومة ومرات بسبب أزمات بتمر بيها البلد.. زكي: مش معنى كدا إن المشروع مش في دماغه ولا هو ناسيه أبدا دا بيعمل كل جهده وبيعصر دماغه كل يوم علشان يطلع بأفكار جديدة تحل المشكلات اللى إحنا فيها دى خاصة مشكلة الإنفاق على المشروع دا.. عبد العظيم: إحنا مش مشكلتنا الإنفاق على المشروع إحنا عايزين نحل مشكلة المركبة الفضائية المصرية اللى تايهة في السما.. زكي: ما أنت إيدك في المية الباردة وبتقبض كل شهر رغم إن ميزانية المشروع دا على حساب حاجات تانية كتير وهو دا اللى بيحاول الراجل الكبير يحلها دلوقتى عن طريق مشروع عبقرى اسمه «صباح الخير يا مصر» وأنك تصبح على مصر بجنيه كل يوم وساعتها هتتوفر الميزانية وهتتحل المشكلات المادية أما المشكلات الفنية مع الوقت هتتحل من نفسها.