في ألبوم الصور عمرك في تحويشه و تسبق ضحكتك دمعه في ساعه شوق تشوف صورتك يدوب عيل لكن مبسوط و تتمنى السنين ترجع لعمر بعيد لضحكه طفل ملهوفه ليوم العيد ينام حاضن في أحلامه بلبس جديد و صوت ثومه تغنيله يا ليله العيد و يستنى النهار يطلع عشان تِكمل معانى اليوم بلمة كل أصحابه اللى مش باقى خلاص منهم غير صوره من الألبوم ********* فوتوغرافيا الحياه واخده علينا عهود نعيش راسمين في تكشيره بنظره بتعشق الحيره و لو لحظه فرح جايه بتتلهف يا حزن تعود ********* و صورتك جوه مدرستك في تخته تحسها بتاعتك *********** و شكلك وانت في الجامعة و فجأه ترسمك دمعه و تنهيده و ميت ضربه على كفوفك و تتردد أوى في خوفك لصوره حاططها بالمقلوب عشان سلمت بالمكتوب و حب العمر ضاع منك و راسم جنبها قلبين و غنوه شاديه ويا حليم بحاجه غريبه جمعتكم وفجأه فراق دخل بينكم و صوت فيروز بقى في ودنك مالوش تأثير و راحت بهجه الدنيا بقالها كتير ************* و منها تنقلك رحله لحزن كبير لصاحبك اللى سميته شهيد النيل صديق عمرك ونومه الأرض في التحرير في لحظه موته برصاصه في أحلامه وآخر جمله قالهالك هنتقابل اكيد تانى و لسه صداها على بالك ********* في آخر صفحه في الالبوم مكان فاضى لضحكه ضيعتها هموم لكن ربك رحيم قادر يخلى فرحتك مقسوم