علّق الإعلامي أحمد موسى، على قرار المرشح الرئاسي السابق، حمدين صباحي، دخول اعتصام مفتوح بمقر حزب الكرامة، برفقة مجموعة من الشخصيات السياسية والعامة، المنتمية للتيار الديمقراطي، وحملة «مصر مش للبيع»، للمطالبة بالإفراج عن الشباب المحبوس، والتراجع عن تسليم جزيرتي «تيران وصنافير» للمملكة السعودية. وقال «موسى»، خلال تقديمه برنامج «على مسئوليتي»، عبر فضائية «صدى البلد»، «البلد بتبني والرئيس بيفتتح عدد من المشروعات التنموية في أسيوط، وحمدين صباحي عاملي اعتصام في حزب الكرامة، أصله زعلان، عمري ما شوفت سياسي بيعمل اعتصام، أُمال الأحزاب وظيفتها إيه؟ أعارض بالاعتصام ولا بالقواعد وبالشغل؟ عمري ما شوفت مرشح رئاسي سابق بيعتصم، أنا عايزك تفضل معتصم، خليك كده، وأنا ليكوا عليّ هبعتلكم أكل كل يوم». وأضاف: «حمدين اتشملل هو وخالد علي وراحوا المحكمة وقالوا إنهم هيعملوا مليونية لمجلس الدولة النهاردة، راح معاهم 22 شخص بالعدد، هي دي المليونية اللي قالوا عليها، إحنا ربنا بالينا بإن كل ما يحصل إنجاز يطلع ناس تصدر صورة سلبية، والله أنا نفسي يعينوا صباحي في أي حاجة، إن شاء يتعين رئيس مدينة كفر الشيخ، عشان يتقاله يا ريس وخلاص، والله ما هعترض، عشان يهدى بقى». وتابع: «صباحي بيعمل هيصة عشان مش موجود وخلاص، بدّل الناس ما تتكلم عن الإيجابيات وافتتاح المشروعات، إنت بتعتصم وقاعد في الكهرباء اللي الرئيس كان بيظبهالك النهاردة، إيه حالة الفشل دي؟ إنجازات بتتم في كل محافظات مصر ودول مصرين يرجعونا لورا، لكن مصر بتتبني وإحنا مش بنهزر، ولا حد في البلد هيرفع سماعة التليفون عليهم، واللي عايز يعتصم براحته».