قال الإعلامي عمرو أديب، مساء السبت، إن النادي الأهلي فاز على غريمه التقليدي الزمالك، بمباراة السوبر التي أقيمت على ملعب هزاع بن زايد، بالإمارات، بالحظ، لافتًا إلى أن «مفيش نادي في العالم بيتمتع بكمية الحظ اللي عند الأهلي، إيه النادي اللي عنده كل الحظ ده؟». وتابع أديب، خلال برنامجه «القاهرة اليوم»، عبر فضائية «اليوم»، «الأهلي كان لازم يكسب، كان يومه، وأهو ماتش وراح لحاله، ولكن اللي مضايقني هو إن مرتضى منصور مصّر إن فيريرا يمشي، هو مين يعمل أحسن من كده؟، الراجل واخد دوري وكأس وعايز تمشيه؟ الراجل ده أحسن مدرب للزمالك، لو فيريرا مشي الزمالك مش هيقوم له قومة تاني، ومفيش مدرب محترم هيوافق يجي النادي». واستكمل: «أوجه التحية للمحترم عبد العزيز عبد الشافي، راجل جاي يكسب ماتش تاريخي ويمشي، إنكار الذات يا جماعة، عشق للفانلة الحمراء، زيزو ده كان أحرف من الخطيب، كان أحرف من رمضان صبحي، واللي عمله ده مهارة، وفي نفس الوقت استفزاز».