بصراحة بكل صراحة مستغربة جدا من شعب مصر مظاهرات من الاخوة المسيحين بسبب اختفاء زوجة كاهن حدث طبيعى زوجين متخانقين ايه الجديد ما هو اصل فى البيت الكاهن بيبقى زوج مش بعيد يعنى عن ان المدام تنكد عليه او ينكد عليها كاهن او شيخ ناصح للناس ديه فى مكان شغله لكن فى بيت الزوجيه صفته زوج فقط عادى يعنى اتنين متجوزين زهقوا من بعض الطبيعى فى العصر الحالى الست قامت واخدة بعضها وسابت البيت الكاهن مش عايز يعترف ان المدام زهقانه منه قام قوم الدنيا ومقعدهاش وولعها حريقة وقال اتخطفت على ايد المسلمين والاخوة المسيحين مظاهرات وهتافات متصحش بالمره ضد المسلمين ليه مش فاهمة طول عمرى عندى اصحاب مسيحيين بحبهم وبقدرهم جدا وعمرى ما حسيت بأى مشكلة ولا هما اللى بيحصل ده حاجة زايده عن الحد اما تشجيع رجال الدين من الجانبين على كره الاخر اسمه تخلف والهتاف بان المسيحى متضطهد كلام فاضى يا ادى عقدة الاضطهاد الوهميه هو يعنى المسلم مش متضطهد من النظام وغلاوتكوا كلنا واخدين بجذمتين وفردة شبشب مسلم ومسيحى الحكومة الحقيقه فى نقطة تعذيب المواطن عندها عدل مبتفرقش طالما مواطن مصرى يبقى لازم تتضطهده التزام حكومى ناحيتنا كلنا كفاية وجع دماغ سيبتوا البلد تخرب واتصدرتوا فى الهيافات وبعد الدنيا ما قامت وشتيمه وقلة قيمة من الجانبين طلعت الست بتغير جو عند صاحبتها كان ليه بقى البالونة اللى على الفاضى ديه افهم لمصلحة مين كل كام يوم صدام بين المسيحين والمسلمين ليه مش فاهمة دا احنا كلنا مصريين اصلنا واحد الدين لله يا بنى ادمين والوطن للجميع ابوس راسكوا مسلمين ومسيحيين وحقكوا عليا ركزوا فى المصايب الكبيره اللى احنا فيها وبلاش خوتة دماغ