أصدرت مجموعة "أولتراس أهلاوي"، اليوم الإثنين، بيانًا للتعقيب على أحداث القبض على 19 شابًا من المجموعة في أحداث مباراة كرة اليد. وقالت المجموعة في بيانها:"من يوم الجمعة اللي فاتت واحنا بنتفرج على مسرحية وحتى كنا شايفين أنها مش مستاهلة مجرد التعليق عليها وقولنا إن ده اكيد تهريج واكيد المسئولين هيتكسفوا من الاتهامات المكتوبة في المحضر". "خلينا نقول مبدئيا كدة ماتشات دوري كرة اليد طول السنين اللي فاتت بجمهور وهو الدوري الوحيد اللي بيتلعب بجمهور بشكل رسمي وجمهور الأهلي كل ماتش كرة يد بينسق من قبليها مع رئيس اتحاد كرة اليد شخصيا وده اللي حصل في الماتش ده فبالتالي المشكلة مش عند الجمهور المشكلة عند أي طرف من الاتحاد أو النادي أو الأمن". "وبالمناسبة لحد دلوقتي الماتشات بجمهور ومفيش قرار رسمي من الاتحاد المنظم للعبة بيقول كلام غير ده.. كلام الاتحاد ملزم للاندية والداخلية في أي مكان في الدنيا". "وفي مصر بيبقى على حسب المزاج، بمعنى أن اتحاد كرة القدم بيلعب الماتشات بدون جمهور والداخلية دايما بتقول انها بتطبق قرار اتحاد كرة القدم، طاب لو النادي جه طلب الماتشات بجمهور هل الداخلية هتسمح ولا هتقول الاتحاد المنظم للعبة مانع ؟!!.. ده بالظبط اللي حصل ماتجيش تقولي النادي بيطلب عدم تواجد الجمهور في حين أن الاتحاد المنظم للعبة بيسمح". "احنا بس مش فاهمين مين في الاخر اللي بيعادي مين ؟ ومين اللي بيحاول بكل جهده يبعد الجمهور عن المدرجات ويحاول يخليه يتواجد في الشارع بيجري ورا صحابه المحبوسين ؟؟.. بس احنا فاهمين كويس مين بيدير موضوع الجمهور في مصر والأشيك ليكم ولشكلكم أن وزارة الداخلية تبقى بتدير اتحادات كرة القدم واليد والسلة عالملأ والمكشوف لأن بجد طريقتكم خايبة وشكلكم وحش". "من ضمن الاتهامات محاولة اقتحام النادي وهو الماتش بجمهور وكمان الجمهور ماراحش ناحية النادي والأمن كان مانع أي حد في الشارع يعدي من عند الأوبرا. في اتهام تاني بالتجمهر، ياعم والله الماتش بجمهور !. اتهام كمان بمحاولة الاعتداء على قوات الأمن.. طاب مفيش ولا محضر واحد ولا تقرير طبي مثلا باللي تم الاعتداء عليهم ؟!. وفي اتهام بقطع طريق بس لحد دلوقتي لسة محدش يعرف أنهى طريق !!". "بعد الطريقة الخايبة والمفضوحة دي كلها القضية اتحالت لمحاكمة عاجلة بكرة -التلات- للشباب المحبوسين وعددهم 19 راجل من جمهور الأهلي محاكمة عاجلة لجمهور كان رايح يحضر ماتش بجمهور ودي طبعا جريمة وجريمة أكبر من جرايم القتل وتجارة المخدرات في بلدنا عشان كدة اتحالت في يومين لمحاكمة عاجلة". مش مكسوفين من نفسكم ومن اللي بتعملوه ؟! خلونا نشوف المسرحية دي آخر فصولها هيكون ايه. الحرية للجمهور