واصل أحمد حسام ميدو، المدير الفنى المستقيل من قيادة الإسماعيلى، هجومه العنيف على حسنى عبد ربه قائد الدراويش، مؤكدًا أن "القيصر" يدعى الانتماء فى ظاهره، على عكس الباطن. وقال ميدو: "جماهير الإسماعيلى تعلم وتقول دائمًا، إن حسنى عبد ربه عمره ما خد بطولة للنادى، والفلوس اللى اتنازل عليها حسنى للنادى فى الإعارات كان يطلع إعارة وبياخد فى السنة 2 مليون دولار، الجمهور بيقول إن حسنى اشترط على مجلس الإدارة التجديد مقابل 3 ملايين و300 ألف جنيه، والحصول حالاً على شيك بمليون ونصف، وإلا مش هينزل الملعب، وفعلاً مانزلش الملعب لمدة 3 أيام لحد ما خد الشيك.. هو ده بقى الانتماء والإخلاص اللى بيقول عليه". وقارن ميدو خلال تصريحاته لبرنامج "الكرة فى دريم" مع خالد الغندور، عبر شاشة "دريم" موقفه مع النادى الأهلى وفى المقابل موقف "القيصر" قائلاً: "حسنى مضى للأهلى لولا أن جمهور الإسماعيلى طلع بجنازة وكفن، خلاه يرجع مرة تانية خوفًا على أهله، هو ده انتماء حسنى، لكن أنا مسئولو الأهلى بمن فيهم القيعى والخطيب وكبار النادى بيقعدوا معايا واطلع من القعدة أقول أحمد حسام عمره ما هيلعب فى الأهلى، وكابتن شوبير شاهد على هذا الكلام وإنى قولت عمرى ما أحط فانلة الأهلى على جسمى". وأضاف "العالمى": "مين المدرب الوحيد اللى فى الزمالك قال إنه لو هيشحت طول عمره، عمره ما هيدرب الأهلى؟!.. مافيش غيرى أنا كباتن كبار رحبوا وقالوا شرف كبير ندرب الأهلى، علشان كده بقول انتماء ميدو لناديه والتضحيات اللى عملها مش تضحيات زائفة، والتاريخ شاهد على ده". وتابع ميدو: "حسنى عبد ربه قال إنى سيبت الزمالك وطلعت احتراف زائف، طيب يبص لنفسه لما طلع لستراسبورج أحد الأندية المهددة بالهبوط وكان شكله قزم وسطهم وشكله كان بالبلس بتاعهم يضحك، وأنا اللى احترفت فى روما وأياكس وتوتنهام ومارسيليا وسلتا فيجو، والعالم كله كان بيتكلم على وأنا عندى 20 سنة". وردًا على حديث حسنى عبد ربه بأنه أعطى بلده العديد من البطولات قال ميدو: "طبعًا، علشان أبوه كان ماسك المدير الفنى لمنتخب مصر، حسن شحاتة كان أبوه حسنى وعماد متعب وعمرو زكى، لكن حسنى ادى لبلده إيه؟! فاز ببطولتى أفريقيا؟!..طيب مانا فوزت ببطولة أفريقيا برضه، مش عايزين نصب ونضحك على الناس".
