كل الظروف والطرق والحياة القاسية بتوديني لطريق واحد وهو صديقي وصاحبي المسطول اللي بيحاول يلهي نفسه في الكورة وتشجيع ناديه المفضل النادي الأهلي اللي ما بقاش النادي الأهلي من ساعة ما مسكه الأخ حسام البدري اللي ما عندوش فكرة عن التدريب ومع ذلك مجلس الإدارة ساكت عليه وسايبه ومش حيقيلوه أو يشيلوه إلا بعد نهاية الموسم بعد خراب النادي الأهلي إن شاء الله علي يد الجزار حسام البدري. سيادة المستشار جلال إبراهيم رئيس نادي الزمالك اللي طلع شعار الشماتة لنادي الزمالك باسم «تبرع لناديك أو ناديك يناديك»، أحب أقول لسيادة المستشار انت عايز المواطن الغلبان العاشق الولهان لناديه أن يتبرع من أجل أن يذهب تبرعه للاعب فلان أو علان ليركب اللاعب السيارة أحسن موديل ويقبض عشرات الملايين والأمثلة كثيرة موجودة قدامنا وكلنا عارفينها لاعبين لايحملون أي شهادة ولكن يمتلكون عشرات الملايين من الجنيهات. ياسيادة المستشار عيب عليك وحرام عليك سيب المشجع الغلبان اللي بيروح الاستاد ويقطع تذكرة لمشاهدة وإلهاء نفسه في الكورة هو بعد مشروع الشماتة بتاع سداد ديون مصر حتيجي ياسيادة المستشار وتطلع شعار شحاتة لاغتناء لاعبي مصر ياعيني همه اللاعيبة دول ناقصين فلوس علشان تشحت لهم وتدفع لهم ملايين لافراد معينيين وباقي ملايين المصريين مهمش لاقيين، سيادة المستشار الغي شعار الشحاتة وكفاية بقي بهدلة في سمعة مصر معلهش طولت عليكم وأحب أقول لكم إن الكلام اللي كتبته ده كان رأي صاحبي المسطول لاني واخد اجازة علشان عيد الأضحي المبارك كل سنة وأنتم طيبين وللأخوة المسطولين برضه كل سنة وأنتم طيبين.
