· فيه حاجتين ممكن الشعب يعمل ثورة علشانهم وهمه «رغيف العيش والحشيش» بقالنا دلوقتي حوالي شهر وفيه أزمة في مصر في الحشيش ورغم الأزمة إلا أن صديقي المسطول كان له رأي في موضوع أزمة السولار. فقلت له إيه ياصديقي هو انت اتسطلت من قبل ما تشرب الحشيش ولا إيه أقولك أزمة الحشيش تقوللي أزمة السولار فقال صديقي المسطول أنا لسه ما تسطلتش اقعد وافهم واسمع قلت للمسطول ماشي أنا حأقعد وحاسمع أما أشوف أخرتها إيه. قال المسطول أنا حأقولك إيه سبب أزمة السولار فقلت للمسطول قول فقال دلوقتي الحشيش إللي احنا بنشربه فيه كارفة سولار يعني أنا عمال أشرب حشيش معجون بسولار لغاية «ما صدري قرب يبقي وابور جاز» بالصلاة علي النبي فقلت عليه الصلاة والسلام، فقال المسطول خلاص كده اتحلت وعرفنا ليه فيه أزمة سولار لأن السولار خدوه تجار الحشيش وعجنوا بيه الحشيش فقلت للمسطول صديقي طيب إيه الحل في الازمات ديه ولحد إمتي حتفضل الدولة عاملة أزمة في الحشيش فقال صريفي المسطول.. فيه حاجتين ممكن الشعب يعمل ثورة علشانهم وهمه «رغيف العيش والحشيش». فقلت للمسطول ولو المصريين ما عملوش مظاهرة الحل إيه في أزمة الحشيش فقال لي صديقي المسطول يبقي قدامنا حلين مافيش غيرهم فقلت إيه همه أنا في عرضك فقال المسطول الحل الاول الحشاشين يعملوا لجوء سياسي لدولة هولندا لانها دولة بتحترم وتقدر الحشاشين والحل الثاني عمل لجوء الي لبنان عند نوح زعيتر زعيم الحشاشين في العالم كله.