كل عام.. يقام مولد سيدي الحزب الوطني، رضي الله عنه وأرضاه، ويحضره الأتباع والمريدون من جميع الكفور والنجوع، وإللي شاف حمص ولا كلشي.. حب وإتلوع ولا طالشي.. يسترك هات حبة بقرش، وكل عام.. يرفع المولد شعارا جديدا، من باب التغيير عشان الناس إللي زهقت، وبقت روحها في مناخيرها، يعني مرة يبقي الشعار عبور المستقبل، مع أننا لسه مزنوقين في الحاضر، زنقة الحرامي في المولد، لا عارفين نعبر حتة ترعة صغيرة، ولا حتي كوبري أكتوبر، مش مستقبل طويل عريض، وبعدين ها نعبر للمستقبل في إيه إن شاء الله؟! عبارات ممدوح إسماعيل؟! ولا قطارات منصور واللي قبله؟! ولا ميكروباص الأسطي عزوز الأعور؟! ومرة.. يبقي الشعار.. عشانك أنت.. انكوي بالنار والقح جتتي.. وأدخل جهنم وانشوي وأصرخ وأقول يادهوتي. كل عام - وربنا ما يقطعلنا عادة - يقام المولد، ويصعد الخطباء المفوهون منبر الخطابة، وكأننا في سوق عكاظ، والجدع إللي معلقته تكسب، وتتعلق علي أستار الكعبة، وأنا ابن وضاح الثنايا.. وابن حرام اللي ما يزقش معايا، اللي يقولك.. أنا والغلابة وهواك.. عايشين لبعضينا، واللي يقولك.. لو كان الفساد سلعوة، هاطلع زمارة رقبته من جوه، واللي يقولك.. حزبنا وطنا.. جمالنا أملنا، واللي تعبان شوية وواخد انفلونزا، يقولك.. علي حسب الريح مايودي الريح.. مايودي.. وياه أنا ماشي.. ماشي ولابيدي. وكل عام.. ينفض المولد اللي انصرف عليه من دم قلبنا، والغلابة قد ازدادت فقرا وغلبا وقهرا، وعماله تشرب مية مجاري، وتأكلا قمح مسرطنا والفساد عمال يقطع في جتت الوطن ويشفيها، وماعدش فاضل غير شوية عضم، بس ممكن الغلابة يعملوا عليها شربة، وآهي حاجة ترم العضم، من ريحة الوطن. الشعار الوحيد اللي ماشي بنور الله، هو جمالنا أملنا، خاصة بعد إعلان رئيس الوزراء، عن إمكانية ترشحه للرئاسة. كل عام.. ينعقد المولد وينفض.. لا الأسعار انخفضت، ولا الفساد حط في عينه حصوة ملح، وقالك كفاية لحد كده، ولا العيال أتعلمت زي خلق الله، ولا المستشفيات الحكومية، فضت الشراكة بينها وبين المجزر الآلي، الوحيد اللي شغال زي المنشار، هو الحاج عبدالقوي، بتاع ياساتر ياساتر.. من قنطرة الدفاتر. محمد الرفاعي