فى كل انتخابات تجده موجودا لايعلق لافتات كثيرة، 3 لافتات على الأكثر وفى أماكن معينة، أمام عينه وفى شارع واحد هو شارع الكورنيش، ولكن ما يميزه وجعله مشهورا هو اسم الشهرة وهو «بيجامة»، ثم منشوراته التى يطيح فيها بخصومه ويكشف أسرارهم وخباياهم بسخرية وبجرأة، وقد تصل هذه الأسرار إلى تفاصيل خفية من تاريخ المرشح أو عائلته، وغالبا تكون هذه الاتهامات موجعة، ولا يعرفها الناخبون عن المرشح. لم يترك بيجامة مرشحا إلا واتهمه أو سخر منه، سواء كان معارضا أو حزبا وطنيا أو مستقلا، ويتداول الناس منشوراته باهتمام، وسخرية فى الوقت نفسه، ينتظرها الكل ويعكفون على حل رموزها، لأنه يكتفى بذكر الحرف الأول أو الأخير من اسم المرشح، والغريب أنه حتى الآن لم ترفع ضده دعوى قضائية واحدة، بل كان هو من أقام دعوى ضد إحدى الصحف، لأنها أطلقت عليه لقب «فاسوخة الانتخابات»، ثم تنازل عن الدعوى لأن هناك من أقنعه بأن كلمة فاسوخة كلمة جيدة، وتعنى الحرز من الحسد والشر. بيجامة يعتبر الأطفال هم رأس الحربة فى معاركه الانتخابية وهو لا ينتقد الرئيس مبارك ولا ابنه جمال ولا يقبل أن يوجَّه إليها نقدا، وشعاره فى هذا: «اخبط فى أى أحد، إلا الباب العالى». فى مقره الرسمى على رصيف كورنيش النيل، كان الحوار معه، وكان بجواره زملاؤه السماسرة، لا ينادونه إلا ب«سيادة النائب». كم عدد المرات اللى رشحت نفسك فيها؟ رشحت نفسى 7 مرات، 3 شورى و3 شعب، وواحدة محليات والشعب دى الثامنة. ليه مش منضم للحزب الوطنى؟ بفكر أدخل، بس لسه بدرس الحاجات اللى بيعملها الوطنى. بتدرسها إزاى؟ يعنى بشوفها تليق علىّ ولاّ لأ، تمشى معايا ولاّ ما تمشيش. بترشح نفسك ليه وانت عارف إنك مش هتنجح؟ لأنى غاوى سياسة، من صغرى كنت زعيما فى اتحاد الطلبة، يعنى أنا سياسى «معتق» وكانوا بياخدونى فى أوائل الطلبة فى المعلومات العامة وياما كسبت. إيه رأيك فى الوضع السياسى الحالى؟ سياسة البلد الحالية ماشية كويس، وأنا واحد من الناس بأيد جمال مبارك يمسك بعد أبوه بعد عمر طويل، قوللى ليه؟ ليه؟ لأن اتنين اترشحوا لرئاسة الجمهورية طلع واحد بلطجى والتانى مزور، واللى عمل الشوشرة فى الدولة كلها وقالوا إن فيه توريث عشان الناس تشك فى نفسها هما بتوع الإخوان، منهم لله، لأنهم عملوا حفرة كبيرة بين الشعب والحكومة. يعنى ناوى تنضم للحزب الوطنى؟ أنا لسه بدرس أنضم لأى حزب، وساركوزى بتاع فرنسا قعد 30 سنة عشان يوصل للرئاسة وللقصر اللى بيحكموا منه. ليه شعب دمياط مش متعاطف معاك مع أنه بيحب المنشورات بتاعتك؟ الشعب الدمياطى مش غاوى سياسة وكل همه الجنيه اللى يدخل جيبه لأن إحنا نصفنا أميين وماعندناش انتماء حتى للرياضة، لذلك نادى دمياط بيلعب فى الدرجة السادسة. ما الاستفادة من ترشيحك نفسك وتبديد أموالك؟ أولا فيه ناس بتطلع زكاة فى رمضان، ودى عندى زكاة على الناس، يعنى أنا لما أكتب منشورات وأفضح الناس المرتشية والحرامية وأفهم الناس كل حاجة وتفهم، يبقى فهمهم ده زكاة، ونتيجة الانتخابات فى حد ذاتها ما تزعلنيش، وكل واحد يعرف حقوقه وواجباته، يعنى عندك مرشحين بيصرفوا ملايين عشان هيسرقوا ملايين. إيه رأيك فى إلغاء الإشراف القضائى على الانتخابات؟ إحنا هنسيب الموضوع ده لضمير المندوب اللى فى اللجنة، ده آخر كلام، والمفروض القضاة ينشروا العدل فى الأرض ومالهومش دعوة بالسياسة هى دى رسالتهم، وأنا من المؤيدين أن القضاة ما تشرفشى على الانتخابات، والرئيس عايز كده. توقعاتك مين اللى هينجح فى الانتخابات دى؟ توقعاتى إن الإخوان هيسقطوا، والمستقلين هيسقطوا وبتوع الحزب الوطنى اللى جابتهم الحكومة هما اللى هينجحوا، وهينجحوا عشان إحنا اتعودنا على كده. معلوماتك اللى بتجيبها فى منشوراتك عن المسئولين وأعضاء الحزب الوطنى، بتجيبها إزاى؟ أنا ليا عيون فى كل حته حكومية بيجيبوا لى كل الأخبار أول بأول، ومعظم أعضاء المجالس المحلية الشعبية المحلية أصدقائى أو كانوا معايا فى المدرسة، وأنا سبق ورشحت نفسى فى المحليات مرة واحدة وسقطت بفارق صوتين. مين بيمشى معاك فى الانتخابات؟ نصف اللى بيمشوا معايا مثقفين ونصفهم أميين وبقعد هنا وهنا، ومابحبش الدعايات والشعارات الكدابة لأن أنا بصرف على نفسى وماحدش بيصرف عليا تعريفة، وأنا ما بعملشى إلا يافطتين أو تلاتة وبيسمعوا البلد. بتصرف على الدعاية منين؟ أنا معايا فلوس كتير، ومش بزعل إذا حد قال إنى سمسار، لأن مهنة السمسار زى الدكتور زى المهندس، وأنا حاصل على دبلوم ميكانيكى سيارات من 20 سنة، والمفروض بعد خمس سنوات أنضم لنقابة المهندسين وآخد كارنيه مهندس، بس أنا مش فاضى للكلام ده. يمكنكم متابعة مزيد من التغطيات من خلال مرصد الشروق لانتخابات برلمان 2010 عبر: مرصد الشروق عبر فيس بوك مرصد الشروق عبر تويتر