والله يا مولانا أنا قلبى انشرح لما نزلت محطة المترو لقيتكم قاعدين وربنا ميسركم لعباده علشان اللى مزنوق فى رأى أو مشورة ياخدها عالطاير كده. يا سالااااام.. ده اللى فكر فى حكاية كشك الفتوى دى دماغه ألماظات. ربنا هيبارك له إن شاء الله. هو ده فعلا اللى كنا محتاجينه. ربنا يبارك فيك يا إبنى. هو بس مش اسمه «كشك». ده اسمه «المقر».. مقر الفتوى. قول يا إبنى. محتاج فتوى فى إيه؟ والله يا مولانا مش عارف أبدأ منين والا منين. فتحى الله يجحمه خلى عيشتنا مرار. ظلمنا آخر ظلم.. وبعدين.. شوف يا إبنى.. إن أصل الظلم فى العربية هو وضع الشىء فى غير موضعه، ومن أمثال العرب.. يا مولانا هو أنا لسه قلت حاجة؟ مش لما تعرف الموضوع! اتفضل يا إبنى. أنا بس اتحمست لأن الظلم ده موضوع كبير جدا فى الإسلام. الظالم اللى باحكى لك عليه ده يبقى عمى. حط إيده على الورث بتاع العيلة وهاتك يا بعزقة. ريع الأرض بيصرفه على نفسه وعلى عيلته. ما بنشوفش منه حاجة. ومش عارفين ناخد من الراجل حق ولا باطل. شوف يا إبنى.. إن أصل الظلم فى العربية هو وضع الشىء فى غير موضعه، ومن أمثال العرب.. يا مولانا بالراحة علينا الموضوع مش بسيط. إحنا استعوضنا ربنا فى الريع. بس اللى زاد وغطى إن الراجل بدأ يحط إيده على أرضنا ويكوش عليها. يا خبر؟!! ده ظلم.. وأصل الظلم فى العربية هو وضع الشيء فى غير موضعه، ومن أمثال العرب: من أشبه أباه فما ظلم. فالظلم هو الجور ومجاوزة الحد. والميل عن القصد. وقد حرّم الله سبحانه وتعالى الظّلم على نفسه وجعله محرما بين عباده. والظّلم يوم القيامة ظلمات. وهو من أشدّ الأعمال ذنبا عند الله. فالظّلم يشتمل على كلّ الأعمال والأقوال التى ترتكب من قبل فردٍ أو جماعةٍ ضد فردٍ أو جماعةٍ أخرى ويكون فيها بهتان أو إساءة لفظية أو جسديّة أو نفسيّة. أو أكل مالٍ أو سلب حقّ. فمن أساء إلى أخيه أو افترى عليه أو بهته أو سلبه حقّه فقد ظلمه. أما عاقبة الظّلم فهى وخيمةٌ فى الدّنيا والآخرة، وقد بيّن النّبى صلّى الله عليه وسلّم أنّ الله يملى للظّالم حتى إذا أخذه لم يفلته. درر يا مولانا.. كلامك درر.. بس أنا لسه ما خلصتش. بعد كل دا بقى اللى بيفتح بقه مننا ممكن يختفى، أو يخلى عيشته مرار لحد ما يطفشه من البلد. الحبس بقى فيه مظاليم ياما.. قلت إيه بقى يا مولانا؟ فى إيه يا بنى؟ فى الظلم. مش ده ظلم وافترا برضه؟ والا ده بره اختصاصات كشك الفتوى؟ يا بنى قلنا اسمه «المقر».. إنت أخدت وقتك. خلينا نشوف غيرك. المقر فاضى يا مولانا مفيش غيرنا. الناس زمانها جاية والمترو بيحدف بشر كل دقيقة. ياللا توكل على الله عشان ربنا يبارك لنا ويحفظنا ويسهل رزقنا جميعا. طب ناولنى دفترك يا مولانا. الدفتر اللى كتبت فيه الموبايل بتاعى والرقم القومى لحسن فيه حاجة مش مظبوطة. لأ ازاى. مش مظبوطة ازاى.. دى بالذات لازم تبقى مظبوطة.. علشان لو حبينا نطور الفتوى أو نرجع لك فى حاجة.. اتفضل.. إيه ده؟ إنت بتغير الأرقام ليه؟ هو أنا نقلتها غلط؟ لا يا مولانا.. فضيلتك كنت كاتبها صح.. سلامو عليكو.
