مصر يا بلدنا يا اللي قامت فيكي أجمل وأحلى ثورة لولا ثورة شبابك لكان الهم بلغ عندنا الذروة قادة البلد نشفوها علينا واشتروا لنا الفقر شروة وخلونا نمشي وكأننا من غير هدوم .. يبان مننا كل شيء .. حتى العورة *** *** مبروك عليكِ يا مصر اللي عملته ثورة شبابك دا السعد جالنا بعد الهم والغم ما دخلوا علينا من بابك والثورة خلتنا نعرف يا مصر مين أعدائك ومين أحبابك دي السجون ها تتملي بكل من سرقك وهانك وداس على جنابك *** *** كنتِ كيكة وقسموها بينهم اللي كنا بنحسبهم – للأسف – كبار والشعب قاعد مستني الفرج وعايش على أمل فك القيود والحصار وكلهم عاملين ينهبوكي يا مصر بكل همة وعزيمة وإصرار واللي كان يتكلم منا يلجموه ويقيدوه زي ما بيلجموا ويقيدوا الحمار *** *** 100 مليون شمعة ووردة أهديها لشبابك يا أحلى بلد يا مصر شباب الثورة اللي نقلونا من عصر "مهبب" إلى أحلى عصر من عصر النهب والفوضى وعصر اللي ناهب كام مليار وعنده كام فيلا وقصر إلى عصر النهضة والخيرات اللي بإذن الله مش ها يكون ليها أية حصر *** *** تحية لشهداء ثورة 25 يناير في مصر بنات كانوا والا بنين اللي ضحوا بأرواحهم من أجلك يا مصر بحب وسعادة وشوق وحنين ونالوا شرف الشهادة من أجلك وده شرف لولاكي كان ها ييجي لهم منين؟ ربنا يحفظك يا مصر ويرعاكِ .. ويرحم شهدائك .. قولوا معايا آمين.