وائل عبد العزيز علشان انا مش من هواة الأكل خالص ، تعاملت مع الأكل السورى لأول مرة فى حياتى الإسبوع دا ومرتين ورا بعض ، وانا مستنى طلبى لاحظت شوية حاجات غير شهادة الناس بإن أكلهم حلو - الإحترام .......... إحترام ملحوظ من البائعين تجاه عملاؤهم بالرغم من ضغط الشغل عليهم. إحترام العاملين لشغلهم بصورة واضحة "وغالباً دا سر من أسرار حلاوة أكلهم" - الإمانة .......... لما طلبت الأوردر أول مرة فى التليفون قالولى الأوردر هيوصلك بعد ساعة ونص!!!!! انا قلت فى نفسى : الواحد إتعود على ال5 دقائق المصرية ولما طلبت الأوردر وانا فى المحل برضه قالولى قدامك من 20 إلى 25 دقيقة علشان ما يحصلش أى خلافات بسبب الإنتظار. رجعت أقول لنفسى : النظام حلو مفيش كلام لما شفت بقى كمية الأكل عرفت قد إيه الناس دى شاطرة بجد لأكتر من سبب أولاً لأن كمية الأكل متناسبة غالباً مع العين المصرية اللى إتعودت على أهرام الأكل فى البوفيهات والسعر كمان معقول مقارنة بنفس الكمية أو النوع فى المحلات التانية. ثانياً ودا الأهم إنهم قدروا يعملوا مجتمع ناجح ويخلقوا لنفسهم فرص عمل فى الوقت اللى ناس كتير بترفض تشتغل أساساً