محمد محمود غفير الحمد لله ( يستاهل الحمد ) تحققت كل شعارات مؤامرة يناير و اي حد شايف غير كده .. خلي بالك النت متراقب ، مين اللي قال ما فيش حاجة اتحققت و مين اللي قال الدنيا دي وسية . الشعار الاول اتحقق بدليل ان " رغيف العيش قد كده .. و يتاكل حاف ، ده مش عيش يا جماعة ده بسكويت " او كما قال عادل امام . الفلوس مرطرطة في كل حتة بس ما حدش واخد باله .. كمان الشغل مالي البلد بس الشباب مكسل .. و الحكومة كل شوية تقول فكوا الحزام فكوا الحزام، او كما قال برضوا عادل امام بس في حتة تانية . اما بالنسبة للحرية فنحن في ازهي عصور الحرية و الديمقراطية.. ممكن تقول ، تكتب اي حاجة و عادي ما تتحبسش .. بدليل اني ما اتحبستش لحد دلوقتي . و اتحدي اي حد يقولي اسم واحد خماسي اتسجن في قضية رأي و ياريت اسم الام لو سمحت . واسئل اللواء منصور العيسوي هيقولك ما عندناش .. ما عندناش . ثم مين اللي قال ان احنا ما عندناش معارضة ، امال حمدين بيعمل ايه . اما عن ملف العدالة الاجتماعية فقد طبقناه علي اكمل وجه و حطيناه في الدرج . واخيرا : اللي هيقولي عدالة اجتماعية ، هاقوله يا شيوعي . و اللي يقولي يناير ثورة ، هاقوله يا اخواني . واللي يتجوز امي هاقوله يا عمي . [email protected]