شقة فول ياريس او تذكرة مترو اعتبروا الايجار القديم شقة فول او تذكرة مترو ليتم معاملته مثل شقة الفول او الطعمية او تذكرة المترو او انبوبة غاز او كيلو سكر او كيلو ارز او كيلو مكرونة او حتى كيلو كوسا ما هي كوسا.. كوسة اصحاب النفوذ والمستأجرين في ظل القانون.. اللي ظلم الملاك سنين واهدر وسلب حقوقهم، بل وسلب الثروة العقارية.. الى الان الدولة والقانون لا يقتربان من قانون الايجار.. ولا اي حكومة او وزارة حتى وزارة الاسكات (الاسكان) لا تقترب من ملف الايجارات القديمة او الجديدة.. فالقديمة سلبت ونهبت حقوق الغير كذلك الجديدة لم تنصف، حيث انه في ظل عدم التقرب لقانون الايجار القديم اصبح اكثر الملاك ممن يمتلكون منازل ولا يمتلكون في ظل القانون التصرف في املاكهم او انهاء عقد الايجار الذي ظل لسنوات يغتصب اموالهم.. فما عليهم الا اللجوء الى الايجار الجديد من اجل اولادهم او من اجل انفسهم يعني لديك ملك مستأجر وما تقدر تتصرف فيه وعليك اللجوء للايجار الجديد.. لكن المستأجر يورث اولاده عقد الايجار بالقانون والاجرة كما هي من سنين.. حتى اصبحت شقة ايجار قديم لا تتعدى ثمن شقة فول في الشهر. اهو احنا بنشوف ونفضل نشوف الحكومة عاوزة كدة.. يعني ترتفع اسعار.. ماشي.. ترتفع تذكرة مترو.. راكب.. ترتفع شقة فول.. آكل.. طيب يرتفع ايجار قديم.. نايم سنين.. طيب ايه الحل يا حكومة.. او ايه الحل يا ثورة.. قامت الثورة من اجل.. عيش.. حرية.. عدالة اجتماعية.. هي فين.. الدولة عليها اعباء كتير.. علشان كدة تبعد عن الايجار القديم.. اما قوت الشعب.. فول.. طعمية.. مواصلات.. ترتفع.. ترتفع.. اشمعنا.. ده حتى الكوسة بقى ما حد يقدر عليها.. كمان حتى التسالي.. يعني لب او سوداني.. او حلويات.. يعني قرطاس لب مفيش اقل من جنيه ويكون شوية لب صغيرين لان كيلو اللب اصبح يعدى ال 40 جنيه.. يعني ما تقدر حتى تتسلي يعني لو انت ماشي مع الحبيبة زي فقر زمان على الكورنيش تؤووم تجيب لك انت قرطاس وهي قرطاس هتصرف كام على القرطاس.. شوف حتى القرطاس بقي بكام واصبح له سعر.. اما تسالي الحكومة فحدث ولا حرج لا يوجد فيها قراطيس لب او تسالي لكن يوجد فيها هوامير القراطيس. شوف يعني لما تروح الشغل وتجيب شقة فول بجنيه وعلى المعترض اللجوء للحكومة (هتعمله ايه) يحط دماغة في اقرب حيطة صلبة.. او كما قيل مش كفاية يعني تذكرة المترو بجنيه وكمان ممكن تضاف اليها زيادة حسب مزاج هيئة مترو الانفاق.. كل ده مش كفاية.. الحكومة عايزة تقل مزاج الشعب حتى السجائر كام سعرها اليوم.. اللي البعض اصبح يشتريها فرط.. او.. لف.. زي زمان.. لكن لسه الاسعار في ارتفاع.. طيب ايه رأي الحكومة لما تخلي شقة الفول او الطعمية او تذكرة المترو او حتي الايجار القديم على بطاقة التموين وتمونا هيه بالكوبونات يعني كل شيء على بطاقة التموين حتى شقة الايجار القديم.. او تجعل او تخصص قطعة ارض.. قيمتها ملاليم على بطاقة التموين.. ده حتى الحيوانات واهمها الحمير هي فين الحمير.. من غلو وارتفاع ثمن الفول انقردت الحمير واصبح من الافضل ذبحها وأكل لحومها. شوف يعني لو عندك ولدين وانت وامهم كام شقة فول وكام تذكرة مترو ولسه باقي المصاريف.. يعني احسبها عدد الاسرة 4 تصرف كام في اليوم 4 جنيه شقة فول و4 جنيه تذكرة مترو يعني 8 جنيه في اليوم اصبح في الشهر 240 جنيه ولسه شقة ايجار قديم لا تجيب ثمن شقة فول او تذكرة مترو.. الحكومة جعلت الملاك زي الحمير مش قادربن على ثمن شقة فول وتذبحهم زي الحمير وتبيع لحمهم للمستأجرين. لقد خرج المالك عن طوره.. كنا نسمع عن واحد مات في مشاجرة من اجل الحصول على رغيف خبز.. او لقمة عيش.. فكم من هذه الحوادث مرت علينا بأنواعها.. واليوم بل ومنذ فترة بدأنا نسمع عن من قتل في مشاجرة بين مالك ومستأجر ايجار قديم.. وكله بسبب القانون.. المستأجر مدقر في القانون والمالك عايز يتفك من القانون.. لكن فين الحكومة.. اهو واحد يموت والثاني يدخل السجن.. وهو ده القانون اللي مدقر في الملاك. اهو كله انتهاك للحياة والخصوصية وبالقانون ومن يقف ورائه ومن يترك قانون الايجار القديم بلا رادع.. شوف الاجور كام.. هي فين واحنا فين (اي الايجار القديم).. فين.. فين الانصاف.. فين اليمين من الشمال (اي فين العدل).. فين الراكب من الماشي.. فين المالك من المستأجر.. فين الحي من الميت..فين.. فين.. وكل شقة فول بجنيه وانتم طيبين يا مفولين. [email protected]
