الإعتراف بالخطأبداية الإصلاح _ ولكن التمادى فيه كارثة تتوراثها الأجيال _ عداوتنا مع اسرائيل تلك الكيان الصهيونى من قديم الأزل _ قد نسميها عداوة ما بعد التاريخ الإسلامى لمصر ودخول عمرو بن العاص _ أو باللعبة السياسية خلاف لا يرجى منه إتفاق مهما طوى الدهر سنين وأيام _ إذ أنها عداوة لسان وعرق وأصول وقبل كل ذلك الدين . ولكن إنقلب الميزان والعقاب كان علينا إذ أننا لا نستطيع أن نلوح بظاهر هذه العداوة ولا تثبت الايام صحة هذه العداوة _ فمهما تسالم الثعلب فهو مراوغ _ ومهما كان ضعف الأسد فهو ملك الغابة _ لم تطالعنى الأخبار يوما على أن مصر أو دولة عربية إسلامية تدخلت فى شئون الدولة المحتلة اليهودية وحتى ان الأمر بات يؤرق المواطن الإسرائيلى .... لم أسمع . ولكنى أسمع جار لى يحدث زوجته وهى تغسل له ثوبة وهو يجلس بجوارها ويقول لها بصوت خافت : خلى بالك أوعى تتكلمى فى السياسة ولا عن اليهود ولا فلسطين _إسرائيل بتسمع كل كلامنا وهتروحى فى ستين داهية أنا بلغتك وانتى حره بعد كده. وزوجته تنظر له بإهتمام بالغ وشديد وتصدق ما يقول . وتأتى أزمة الخبز ليتسامر الفلاح البسيط مع جاره فى الارض بأن إسرائيل وراء أزمة الخبز واللحمة والغاز . وتيجى هزيمة مصر فى تصفيات كأس العالم ونسمع الشباب الصغير والذى لم يبلغ الحلم بيقول أكيد إسرائيل ورا الهزيمة دى حسن شحاته برئ وحيات المصحف برئ . وغيرها وغيرها وااااااخر ما سمعنا إن اسرائيل صاحبة فكرة لازم ثورة فى مصر . يعنى أكيد إسرائيل فى وجهة نظر كتير من شعب مصر ورا كل البلاوى اللى بتحصل _ طب ممكن نصنف كل اللى خرب بلدى واتسبب فى موت ناس كتير ومرض وجهل وإهمال وفساد وقتل بإنو إسرائيلى يعنى عدوى . يعنى مبارك إسرائيلى ونظيف والوزارة كلها من إسرائيل _ يعنى مراتى لما تنكد عليا فى البيت تبقى أكيد متسلطه من اللى ما يتسمو الإسرائليين . الجيش المصرى يعرف ان فى عداوة بينا وبين إسرائيل ( أكيد يا بنى امال حاربو ليه سنة 73 وقبلها ) وحكومة الثورة تعرف كده (طبعا أوف كورس ) والقضاة عارفين كده( يووووووووه أيوه يا بنى مش هما اللى رجعوا طابا بالتحكيم الدولى) يعنى احنا كنا ممكن نديهم طابا قانون جديد ونعمل عقد بينا وبينهم واحنا الحمد لله معانا ارض كتير وهما غلابة بيدوروا على أرض تلمهم وبالمرة نلهيهم عن فلسطين ولبنان وسوريا . لا طبعا ده حق المصريين ودمهم سايل فيها ومين يفرط فى حق بلدو وناسوا . امال ليه بنديهم الغاز واحنا مش لاقيين غاز ليه؟ ها ؟ ما حد يرد عليا ؟ استنى ... ممكن يكون الغاز بتاعنا مسرطن ولا زى حصان طرواده وممكن نحتل بيه إسرائيل ؟ ممكن .. وجايز .. فى الزمن ده كل شئ جايز .