خناقة عادية زى اللى أتعودنا نشوفها فى كل برامج التوك شو حصلت على الهواء مباشرة بين الاعلامى عمرو أديب و الناشط السياسى علاء عبد الفتاح خلال برنامج القاهرة اليوم ، والسبب أن أديب شدد على ضرورة التظاهر السلمى وعشان محدش يفتكر ان الثوار كسروا أو حرقوا حاجة ، أديب قال انه يقصد بالتظاهر السلمى انتقاء الالفاظ المستخدمة فى الهتافات.. علاء عبد الفتاح حاول انه يوصل لعمرو اديب ومصطفى شردى ان المتظاهرين محروقين على البلد وبيحاولوا طاقتهم السلبية فى الهتافات وان الهتافات دى مش هتودى البلد فى مصيبة-كما ادعى اديب فى بداية الحلقة- وقال لهم بصريح العبارة يا جماعة احنا مش مختومين على قفانا عشان تفهمونا ان مجرد هتافات فيها غضب هتودى البلد فى داهية , لكن عمرو وشردي " هروا " الجدع تريقة وسخرية . وعلى فكرة دى مش اول مرة يعملها عمرو اديب فى ضيف عنده .. اللى خلاه يطرد عبد الرحمن يوسف القرضاوى - سواء اختلفنا او اتفقنا معه - لكن عمرو اديب يلاحظ انه بعد ان خفت نجمه بعد الثورة اصبح همه الشاغل لفت الانتباه اليه ولو بالتهزىء والتريقة على الضيوف , والحق يقال ان تطبيل شردى له بيعمل شغل عالى جدا على الهواء ، والغريب ان مفيش مرة شردى عارض اديب فى قضية ما .. وكانهما روحين فى زكيبة واحدة. المهم ان المتظاهرين الفيسبوكيين حبوا يردوا على أديب بتأليف هتافات حنينة كما طلب ، واليكم نص هذه الهتافات: الشعب يستاذن فى اسقاط النظام يا اخوان يا اخوان استلموا السلطة بنعيط من زمان من حقنا من حقنا نحلم بسلطة من دمنا مش هنخاف مش هنطاطى سيب السلطة بقى يا حياتى امشى بقى بليز احنا فقدنا التركيز اللى بيسأل احنا مين احنا كيوت وطنيين ولذلك فنحن نطالب باقى المتظاهرين الذين يهتفوا بغضب وبتعصب ضد ان يلتزموا بالهتافات المؤدبة عشان اديب ميزعلش وياريت كمان مينسوش جهينة ميكس عشان العيل اللى جواك , اخيرا احب ان اذكركم اننا لسنا ضد او مع طرف بعينه ولكننا مع الاحترام بشكل عام وليس احترام الطرف اللى السلطة فى ايده والتريقة على المواطن العادى الغلبان ..ولا أنت إيه رأيك ؟!