دنيا حامد 20 سنه طالبة في الأكاديمية البحرية بقسم إدارة الأعمال، وهى ملكة جمال مصر 2010 لا تري أنها أجمل بنت في مصر، ولا تفكر في العمل في السينما، وتندهش من نظرة الناس لمسابقات ملكات الجمال، آراؤها وقصتها في السطور القادمة. كيف جاء إشتراكك في مسابقة ملكة جمال مصر ؟ أنا بحب الموضة والملابس جدا، وعندي هوس بهم وكنت أتمني أن أصبح عارضة أزياء، وبالفعل قدمت في مسابقة لإختيار مصممى أزياء وعارضات علي شاشة lbc وكان برنامج تليفزيون واقع إسمه mission fishon وكان يوسف سباهي منظم مسابقة ملكات جمال مصر أحد أعضاء لجنة التحكيم وبعد المسابقة شجعني على الإشتراك في مسابقة ملكة جمال مصر. تجربة تليفزيون الواقع ماذا أضافت لك ؟ أنا لم أستمر في البرنامج فترة طويلة لأن مايشاهده الجمهور علي الشاشة غير ما يحدث في الحقيقة، فهذه البرامج فيها ضغط عصبي كبير وكل المتسابقين بيمثلوا وفكرة إنك مراقبة 24 ساعة صعبة جدا، ومصر كانت وحشاني جدا وأمي وإخواتي وكنت بدخل في نوبات بكاء هستيرى، ولكن أيضا هي كسرت حدة خوفي من الكاميرا ومن مواجهة الناس لأني بتكسف جدا بس دلوقتي أحسن بكتير. عملتى أيه علشان تكونى ملكة جمال مصر ؟ طبعا إهتميت ببشرتي وأهم حاجه النوم كويس والرياضة الصبح وبالليل، وتوقع كل الأسئله من لجنة التحكيم وطبعا طريقة المشي والكلام واللي كنت إتعودت عليهم من البرنامج ومن خلال عملي كموديل. رد فعل أهلك إيه لما طلبتي منهم الإشتراك فى المسابقة ؟ طبعا أنا والدتى بتثق فى جدا إضافه إلي إني طول الوقت قبل ما كنت أشترك في أى برنامج أصحابى كانوا يقولولي قدامها إنتي لازم تبقي عارضة أزياء لأني طويلة ورفيعة ووالدتى عارفة عشقى الشديد للأزياء فعندما طلبت منها الإشتراك فى البرنامج ثم المسابقة شجعتني، وقالت لي إعملي الحاجة إللي بتحبيها. مسابقة ملكه جمال مصر كانت مهددة بالإيقاف بسبب الإعتراضات الأخلاقية عليها ده مضايقكيش ؟ المسابقة دي بتتعمل في مصر من سنة 1926 وإللي بتعملها شركه ليها إسمها والسنة دي كانت معروضه علي شاشة قنوات النيل المتخصصة التابعة للتليفزيون المصرى ولو في أي إعتراضات عليها أكيد التليفزيون الرسمي مش هيعرضها إضافه إلي إني واثقة في نفسى، وأنا بنت محترمة وكل الناس عارفة كده، والحمد لله علاقتى بربنا كويسة، وبستخيره فى أي شىء قبل أن أقوم به، وأنا الحمدلله محافظة علي الصلاة والصيام، وأنا بستغرب من نظرة بعض الناس لبنات بيحبوا الموضة والأزياء إيه الغريب في كده وإيه علاقة ده بالإحترام. معظم المشتركات في هذه المسابقة تكون بالنسبة لهم باب للعمل في السينما هل تفكرين في التمثيل ؟ أنا مبفكرش في التمثيل خالص لأنى فعلا منفعش بأي شكل من الأشكال، ولأنها طبعا مهنة مرهقة جدا ويدفع أصحابها ضريبة شهرتهم من التدخل في حياتهم الشخصية كمشاهير، إضافه إلي أني مقتنعة أن عملى كعارضة أزياء هو هواية ومرحلة، لأن العارضة في النهايه لها سن بتتوقف عنده، وأنا نفسي أعمل في البورصة أو أى مجال خاص بالتجارة، لأنه متصل بمجال دراستى إدارة الأعمال. إنتي كنت ممثل مصر في مسابقة ملكة جمال العالم في أمريكا منذ أسابيع قليلة كيف إستعديتي لهذه المسابقة ؟ طبعا دى مسابقة مختلفة غير أي حاجة أنا إشتركت فيها قبل كده، وكنت مبسوطة جدا لأني إتعرفت علي بنات من كل الجنسيات وأنا إستعديت لها الإستعدادات الشكلية العادية وإشتريت للمشتركين هدايا تعبر عن روح بلدي مصر وجهزت لبسى الفرعوني المميز، ووصلت للمرحله الثالثه من المسابقة، وهى مرتية جيدة. إمتي ممكن تكون ملكة جمال العالم مصرية ؟ والله مش عارفة بس هو في حاجة مش مفهومة بس البنات إللي بيكسبوا غالبا فعلا بيكونوا هم الأفضل، بس علي ما أعتقد إن الموضوع له حسابات سياسية أو تجارية من الرعاة والمعلنين، لأنهم بيستهدفوا المجتمعات المهتمة بهذه المسابقات مثل دول أمريكا اللاتينية، لأن هذه المسابقة بالنسبة لكوستاريكا أو كوبا زي كأس العالم في كرة القدم عندنا، والبلد بتشجع البنت لكن المجتمعات العربية مش كده ومكنش فيه ممثل للعالم العربي غير مصر ولبنان. دايما نسمع ملكات الجمال بيتحدثوا أنهم الأفضل وأن لقب الملكة مسئولية ؟ أنا مش أجمل بنت في مصر في بنات أجمل مني كتير بس يمكن أنا جاتلي فرصة متوفرتش لحد منهم، وأنا كمان عندى لغة ومهتمة بالموضوع مش أكتر أما بالنسبة لموضوع إنه مسئولية، ده فعلا لأني بمثل مصر في كل شئ خاص بالأطفال ومساعدة المحتاجين، وضحايا الحروب في كل دول العالم إضافة إلي إشتراكي في جمع التبرعات لبناء مبنى معهد الأورام الجديد ونادى 25 للتبرع بالدم ينابيع الحياة ورعاية المعاقين وأطفال الشوارع وأعتقد أن هذه رسالة إنسانيه للرد علي كل من يشكك في أخلاق ملكة جمال مصر أو المشتركين فيها.