معظمنا بيحب الحواوشى، لكن فيه ناس بتحب تأكله عند "شلبى" فى وسط البلد، وفى ناس بتفضل خلطة "عيسوى" الموجود فى أول شارع شبرا، وناس تانية بتخاف على صحتها وبتأكله فى البيت، لكن جربت تاكل حواوشى العزيزية ؟! العزيزية دى قرية موجودة فى محافظة الشرقية، حكايتها إن كل أهلها وكمان أهل القرى والمدن المجاورة وطلبة جامعة الزقازيق بيتجمعوا كل يوم أربعاء حوالين كوبرى بحر دير مواس الموجود وسط القرية، وبيقعدوا على القهاوى وكمان على أرضية الخضرة حوالين بحر دير مواس "وهو ترعة كبيرة" ، تعرفوا بيعملوا إيه بقى؟! بياكلوا حواوشى! على فكرة القرية دى تقريبا مفيهاش بطالة، لأن معظم شبابها بيشتغلوا فى الجزارة أو الأفران، فتقريبا كل 100 متر أو أقل بيقابلك محل جزارة، وكمان الأفران منتشرة فيها بشكل كبير، لكن إزاى الحواوشى بيتعمل؟! رغيف الحواوشى فى العزيزية تقريبا بيتكلف 12 جنيهاً، لأن الرغيف الواحد بيحتاج ربع كيلو لحمة، واللحمة هناك الكيلو ب38 جنيهاً، فى ألأول بتروح عند الجزار هو بيقطع اللحمة ويحط عليها البصل و" التتبيلة " وبيقطعها ويفرمها بإيده من غير ما تتحط فى ماكينة ، وبعدها بتاخد اللحمة وتروح الفرن هناك فى عجينة متجهزة علشان كده وبعدها الفران بيظبطها وبالهنا والشفا، على فكرة الرغيف الواحد ممكن ياكل منه شخصان . ناس كتير فى العزيزية مش عارفه الحكاية ، وبعد ما لفينا شوية فى القرية، لقينا فران اسمه محمود عبد العال، قال إنه كان شغال زمان فى فرن فى السويس وكانوا متعودين انهم كل خميس بيعملوا حواوشى مع بعض فى الفرن، ولما رجع بلده العزيزية نقل الموضوع ده لزمايله فى الفرن اللى بيشتغل فيه، الكلام ده كان فى سنة 1975، وواحدة واحدة بدأ الموضوع ينتشر بين أهل القرية لحد ما بقى ظاهرة ، والموضوع ده عمل سمعة حلوة وشهرة لقرية العزيزية!!