في مشروع فريد من نوعه وبعون الله هايكون الأخير سيتم استخدام الرسائل النصية التي ترسلها الهواتف المحمولة لمساعدة النساء في الحد من ظاهرة التحرش، حيث تقوم السيدة المتحرش بها بإرسال رسالة نصية إلي جهاز كمبيوتر مركزي مخصص لهذا الغرض وبعدها تحصل السيدة المتحرش بها فوراً علي المشورة للتعامل مع المتحرش. فعندما تتصل السيدة للتسجيل في هذه الخدمة تسمع عدة اختيارات: الأول: إذا كان المتحرش طفلاً تضغط رقم «1»، وإذا كان حدثاً تضغط الرقم «2»، إذا كان فوق سن ال18 عاماً تضغط الرقم «3»، إذا كان فوق ال30 تضغط الرقم «4»، وإذا تجاوز ال40 عاماً تضغط «5»، أما بقي إذا كان في الخمسين فما فوق فيبقي «6»، ولو فوق السبعين يبقي «7» وإذا قرب يموت يبقي «8» وإذا كان بيتحاسب يكون الرقم «9» أما في حالة انتهاء التحرش عليها بضغط زر الصفر. وبعد الضغط ترسل رسائل علي النحو التالي: الكمبيوتر: إنتِ فين؟ فترد السيدة برسالة قائلة: «أنا في المهندسين» الكمبيوتر: آه صحيح باين عندي بالGPS إنك في المهندسين.. بس فين بالضبط؟!» السيدة: «وهو الكمبيوتر مش مبين لك أنا فين؟ الكمبيوتر: لا واضح عندي إنك في شارع شهاب بس أنا كنت بتأكد مش كده برضه أنتِ في شارع شهاب؟ السيدة بالضبط كده!! الكمبيوتر: «هو المتحرش بيعمل إيه علي وجه التحديد؟» فترسل السيدة متعجبة: بيتحرش بي!! فيرد الكمبيوتر مُلحاً: أيوه إزاي؟ فترد قائلة: يعني هايكون بيعمل إيه بيعاكسني! الكمبيوتر: أيوه أصل معاكسة عن معاكسة تفرق يعني لو بيتكلم بس..غير لما يكون بيمد إيده. السيدة: والله هو من دقيقتين بس كان بيتكلم.. لكن دلوقتي بدأ يمد إيده. الكمبيوتر: طب هو بيضرب.. ولا بيعمل حاجة ثانية؟! أصل لو بيضرب هاقولك تعملي إيه.. ولو بيعمل حاجة تانية هاقولك تتصرفي إزاي. السيدة: لأ خلينا في الأوبشن الثاني.. بيعمل حاجة تانية!! الكمبيوتر: زي إيه كده؟ السيدة: إحنا في إيه ولا في إيه.. المهم إنه بيتحرش بي!! الكمبيوتر: حيث كده.. أنا هاقولك تعملي إيه بالضبط.. أول حاجة: لازم تبعدي عنه مسافة 1 متر.. ما هو برضه لازم نحافظ علي المتر وأقله تساعدي في مكافحة أنفلونزا الخنازير. - السيدة: أبعد إزاي؟! ده لازق في!! الكمبيوتر: ابعدي بس.. وصوتي ولمي عليه الناس.. ما هو لازم يطلع بجُرسة أمال هاتسبيه يفلت كده بالساهل. السيدة: صوّت وماحدش عبرني. الكمبيوتر: خلاص دوَّري علي طوبة واخبطيه بيها. السيدة: مافيش أي طوبة جانبي لأول مرة بشوف الشارع نظيف.. طب أعمل إيه ياكمبيوتر؟! الكمبيوتر: ........... السيدة: ياكمبيوتر رد علي. الكمبيوتر: ............. السيدة: أبوس إيدك، اعتبرني زي بنتك.. إنت ماعندكش عيال؟! الكمبيوتر: .............. السيدة: بعد محاولات يائسة تضغط صفر معلنة «انتهي التحرش!!».
