فاضل أيام ونبتدي السنة الجديدة، أنظر إلي القطن الذي وضعت عليه العدس لينبت قبل السنة الجديدة لتكون سنة خضراء كما تعودت في بيت العائلة.. إلا أن العدس لم ينبت ككل عام، الظاهر مسرطن.. وافتكرت أن السنة اللي فاتت نبت وكان أخضر وجميلا إلا أن ده لم يفرق في سياق السنة! المهم إني فكرت إني لازم أعمل حاجة مختلفة عشان أستقبل بها السنة الجديدة ..قلت أعمل زي فافي لما راحت لدكتور نساء عشان تستعيد ذكري يوم زواجهما الأول إلا أن طلاقها بعد هذه المفاجأة محا الفكرة نهائيا.. وقلت أغير لون بشرتي بخلطة كاديرا الهندية وافتكرت إني لما عملتها من شهرين جوزي قال لي إيه الطفح الأحمر اللي علي جلدك ده؟! علي فكرة الخلطة دي لو تحبوا تعملوها هي ترمس مطحون وزبادي ودم غزال من العطار تعجنوها وتترك علي الجسم عشر دقايق مش أكتر وتتشطف وبس، لكن أنا نسيتها نص ساعة أصلي كنت بكلم هادية في التليفون وكانت بتحكي لي عن خناقة هدي ورشيد في النادي والفضيحة اللي حصلت في الكروكيه! علي العموم ده مش وقته نرجع لراس السنة..فكرت إننا ممكن نروح عند أنكل شوكت، حقيقي لا جوزي بيطيقهم ولا هم بيطيقوه ..! بس القعدة تجنن وبيبقي عندهم كام فنانة درجة تانية كده، لكن لا.وألف لا مش هاروح لأن فيه واحدة فيهم استعبطت وقامت تبوس الكل بعد السنة الجديدة ما هلت وكانت بداية سوده علي جوزي اللي حلف إنه ما أخدش باله إنها مش من العيلة..؟! وحلف ما يروح تاني .. خلاص يبقي مفيش غير الشلة القديمة نتلم في أي بيت وأهي تبقي قعدة شوية مزيكا وشمع وخلاص وقمت اكلمهم لقيت اللي رايح شرم واللي طالع الأقصر واللي بيروت! ولغيت الفكرة دي تماما قلت خلاص أخليها عائلية، إخواتي ولقيتهم اكسل من الكسل واتهموني بأني رايقة وسنة جديدة وقديمه.. إيه وإن كله محصل بعضه ... لكني لم استسلم ولاقيت إن خلاص فاضل ساعات والسنة الجديدة تهل نزلت جبت لحمة للشوي ومشروم وشمع وبلالين وروقت البيت وطلعت مفرش أخضر وحطيته علي السفرة. وشجرة صغيرة كان جوزي اشتراها لما كنا في إيطاليا في شهر العسل رغم أني عرفت بعد كده في لحظة مصارحة إنه لقاها في البارك اللي ورا الأوتيل لكن مع ذلك بسيبه يقول إنه اشتراها .. وتبلت اللحمة ونفخت البلالين وكل حاجة جاهزة وقلت أسيب جوزي ينام ويصحي براحته وأهو أكون أخدت شور وسشورت شعري .. ..، الساعة 9 مساء فتحت الشواية وحطيت اللحمة وقفلت باب المطبخ ودخلت البس واستعد للسنة الجديدة وطلعت بنطلون زيتوني وقميص لبني لجوزي لأني بحب اللونين دول وطلعت بره اتفقد الجو الشاعري اللي هانستقبل فيه 0102 ودورت الموسيقي وشويه.... وشميت ريحه شياط وجريت علي المطبخ لقيت اللحمة قد تحولت لكربون ولم أزعج نفسي وقلت أطلب دليفري ومحيت أثر الجريمة وطلعت وقفلت باب المطبخ وقلت أعيش الرومانسية إلا أن صوت المنبه وتلاه صوت زعيق جوزي وإني مفتريه وإزاي أصحيه الساعة 01 مساء عشان السنة الجديدة قد أضاع قليل، من الرومانسية إلا أنني رسمت ابتسامة وتوجهت إليه وبصوت ناعم قلت يلا قوم ألبس السنة الجديدة قربت لاقيته بيبحلق في ويقولي.. أهلا وسهلا أنا هاستقبلها كده بالبيجامة فيه مانع ولا مش هاترضي تيجي، وتماسكت أكتر وبنفس الصوت الناعم قلت له طيب عشان خاطري البس البنطلون والشميز ده .. بص لهم وقال يوووه هو مفيش إلا اللونين دول، المهم بعد محايلات لبسهم وطلع الصالة وكأننا في عزاء، المهم قلت له ترقص معايا، وتقولوا قلت له إني عايزه لبن العصفور .. لقيته قعد يزعق ويقولي إنتي أكيد مش طبيعية وإني مش حاسة بالدنيا و.. و.. وراح داخل الأوضة وقالع ونام وبصيت علي الساعة لقيت فاضل عشر دقايق أخدت بعضي ودخلت وراه ومعايا كل البلالين اللي نفختها عشان السنة الجديدة وحطتهم علي الأرض ومع الساعه 21 فرقعتهم كلهم في أقل من ثواني إزاي معرفش وأهو مر يومين من السنة الجديدة ومش عارفه ليه جوزي مش بيكلمني آه نسيت أقولكم إن دي أجمل بداية سنة لي وكل سنة وأنتم طيبين.
