جلسة كوتشينج .. فوق السحاب

- عايزة أفقد الذاكرة.. عايزة أنسى الحلو قبل الوحش.. عايزة أنسى المشاعر.. الجميلة قبل الموجعة ..
- المشاعر المؤلمة، ومفهوم عايزة تنسيها ليه بس المشاعر الحلوة دى نعمة.. دى ذكرى عايشة فى وجداننا.
- عايزة أبدأ صفحة بيضة.
- طيب لو بقيتى صفحة بيضا وهتبدأى تكتبى.. هتحبى تكتبى فيها إيه؟
- مش عارفة.. بس ممكن أكتب قصة حب لها بداية و مالهاش نهاية.. ممكن أكتب حاجات كتيرة حلمت بيها وما كملتهاش.. اكتبها للنهاية سيبينى فى معاناتى وخليكى انتى لايف كوتش عايشة فوق السحاب.
- اللايف كوتش مش عايش فوق السحاب.. اللايف كوتش بيااخد بإيدك من تحت المطر لمكان ظليل تتحكمى فيه فى مشاعرك .. قولى لى إيه اللى عاجبك فى أنك تكونى ورقة بيضا، أو إنسان بلا مشاعر، تخيلى الحياة هيبقى شكلها إيه؟ طعمها إيه؟
- هارجع أبص فى عيون البشر من غير ما أفكر.. هاتحرر.. من كل شىء..
- يااه للدرجة دى إنتى محبوسة جوة مشاعرك؟ عايزة تتحررى منها ولا عايزة تتحكمى فيها.
- أكيد أتحكم فيها وأخليها زى الخاتم فى صباعى.
- طيب إزاى ممكن تعملى دة وانتى سيبتيها تسيطر عليكى لحد ما حبستك كدة لدرجة إنك عايزة تخلصى منها تماما وحاسة أن ده تحرر.
- مش عارفة.. بس حابة أنى عايزة أخرج من الحبس ده عايزة أكسر القضبان حتى لو كان من دهب
- المشاعر اللى جوانا غالبًا بتكون نتيجة أفكار اتزرعت فينا من خبرات مرينا بيها سواء كنا واعيين بدا ولا لأ سواء كنا أطفال أو كبار ..الأفكار دى هى اللى بتخليكى تشوفى حاجة معينة حلوة وتحبيها أو ووحشة وتكرهيها.. عشان نسيطر على المشاعر لازم نوصل للأفكار دى ونتعرف عليها الأول.. ينفع تسيطرى على حاجة وأنتى مش عارفاها؟ الكوتشينج بيساعدك توصلى للأفكار دى تعرفى المشاعر دى أساسها إيه وجايه منين وبيساعدك تشوفى الصورة الكاملة اللى تسببت فى تكوين الفكرة دى وبالتالى الشعور ده .. بكدة ممكن تشوفى ظروف وملابسات وسيناريوهات كتير كنتى غافلة عنها.. ودة بيخلينا نعدل فى أفكارنا بإيدينا وفقا للصور الجديدة اللى شفناها .. وبيخلينا نحدد الشعور اللى نتج عن الفمرة القديمة (وحدة مثلا..) ويخلينا نشوف أن الحقيقة أن الوحدة دى خلتنا نبقى أقوى وأنضج وأكتر استقلالية .. فشعور الألم من الوحدة ممكن يتحول لفخر واعتزاز بالنفس .. وبكدة التعرف على الأفكار وعلى المشاعر بيساعدنا نفهم نفسنا ونسيطر على مشاعرنا ونعيش الحياة بشكل أفضل وأكثر إيجابية وقوة .