ملك محمد: من مثلك الأعلى؟ الرئيس: تعلمت حب العمل من والدى.. والحكمة من والدتى تحدثت الطفلة ملك محمد، وهى بطلة سباحة فى نادى الشمس، وتدرس البيانو، وتغنى فى فريق دار الأوبرا، وسألت الرئيس قائلة: من مثلك الأعلى؟ وأجاب الرئيس: «دائما الناس فى السؤال ده بتقول أشخاص.. أنا عندى نماذج كتير من الناس.. مخدتش حد لوحده يكون مثلى الأعلى.. أول من تأثرت بيهم وكانوا نموذجًا.. أسرتى اللى عشت معاهم.. والدى والدتى.. والدتى كانت شديدة الحكمة والصبر.. ومش عاوز أكون منحاز وأقول مش شوفت نموذج مثل ده.. والدتى علمتنى التجرد.. يعنى إنى أشوف الأمور بمعيار بعيد عن الهوى والانحياز والتمييز، أحكم عليها وأوزنها بالتجرد.. ومالقتش أعز منها ولا أكرم منها.. الله يرحمها». وأضاف: والدى كان شديد الهمة وفضل يعمل من الفجر لغاية 12 بالليل.. وكان ميسور الحال، لكنه شديد الهمة ويحب العمل.. وخدت دى منه.. وكان لى عم شديد الكرم والرفق بالناس.. لم أر فى حياتى نموذجًا كريمًا جدًا مع الأطفال والضعاف.. ده عمى.. أنا مش خدت نموذج واحد.. والنماذج دى طيبة أتمنى من الله يجازيهم خيرًا ويرحمهم». بسملة محمد: بتشتغل كم ساعة فى اليوم؟ الرئيس: مبعرفش أقعد من غير شغل.. وكان نفسى أطلع طيار سألت الطفل بسملة محمد، الرئيس السيسى عن عدد ساعات عمله فى اليوم؟ ورد الرئيس: أنا معرفشى أقعد من شغل، لأنى بحلم، وعايز الناس تحلم، ولما تحلم تجرى على حلمها، ولازم ربنا يساعدها، واللى بيشتغلوا معايا تعبوا.. لازم نشوف بلدنا أحسن بلد فى الدنيا. وسألت الطفلة بسملة الرئيس السيسى، حضرتك بتعرف تسوق طيارة؟، فمازحها الرئيس إنتى غاوية موضوع الطيارة ده فعلًا.. هطلب من وزير الدفاع إنك تركبى طيارة ثنائى مع أحد الطيارين، وهنصورك ونطلعك ونورى الناس وهى فى الطيارة، وعلق الرئيس: «البركة والرحمة موجودين معانا النهاردة». وقالت الطفلة: «حضرتك وأنت صغير كان نفسك تطلع إيه»، فرد الرئيس: «كان نفسى أطلع طيار، ودخلت الكلية الجوية سنة 70 لكن محصلش نصيب». على أحمد: أصعب لحظة عدت عليك؟ الرئيس: أصعب لحظة عدت عليَّا لما حسيت إن بلدنا ممكن تضيع تحدث البطل على أحمد بطل الجمهورية فى ألعاب القوى والحاصل على 49 ميدالية مختلفة، مع الرئيس عبدالفتاح السيسي، وسأل عن أصعب وأسعد لحظة للرئيس. ورد الرئيس: «أصعب لحظة إللى حسيت فيها إن بلدنا ممكن تروح، أحيانًا يكون فهمك مش كده يعذبك لو أنت بتفهم وتعرف قوى ممكن تتعذب قوى لأنك هتشوف حاجات محدش هيعرفها غيرك، أصعب لحظة طب ليه خفت، خفت على ناسى وأهلى وكل الناس اللى موجودة فى مصر عددنا كبير وظروفنا صعبة فلو البلد راحت الناس دى هتروح فين؟. وعن أسعد لحظة قال الرئيس: «لسه مجتش، هو الحلم اللى أنا بحلمه لبلدى برضه، بيكم وبمصر والمصريين والشباب والكبار وبقادرون باختلاف اللى بعول بيهم أمام الله وبقسم بيهم أمام الله أنه يساعدنا». وأعرب البطل على أحمد من ذوى الهمم وبطل الجمهورية فى ألعاب القوى والحاصل على 49 ميدالية مختلفة، عن أمنيته فى مقابلة النجم محمد صلاح كابتن منتخب مصر ولاعب نادى ليفربول الإنجليزي، وعلق الرئيس عبدالفتاح السيسى خلال احتفالية قادرون باختلاف: بطل ودايما مع مصر». نورهان عثمان: أكثر أمنية شخصية؟ الرئيس: أمنيتى الشخصية إن ربنا يرضى عنى وأتمنى لبلدى الأفضل تحدثت الطالبة نورهان عثمان أول بطلة تزلج على الجليد ولاعبة سلة وعارضة أزياء ومن قادرون باختلاف، مع الرئيس عبد الفتاح السيسي، قائلة: «منور يا سيادة الرئيس.. وسؤالى إيه أكثر أمنية شخصية؟.. وإيه أكثر أمنية تتمناها للبلد». ورد عليها الرئيس عبد الفتاح السيسي، قائلًا: «أمنيتى الشخصية أن ربنا يرضى عنى.. دى أمنية عزيزة أوى.. ربنا عظيم السماوات والأرض.. صاحب الكون كله.. صاحب الملك كله.. يرضى عنى.. يا ريت.. دى الأمنية الشخصية». وتابع الرئيس السيسى: «أنا بحلم لبلدى.. وبحلم بيها.. وإحنا مشينا خطوة من ألف.. فاضل خطوة من ألف يعملها المصريون». وقالت الطالبة نورهان عن أمنيتها الشخصية: «نفسى أكون مذيعة وممثلة وعارضة أزياء.. محدش يقول ذوى إعاقة.. إحنا القادرون باختلاف ونفسى أكون ممثلة»، ليرد عليها الرئيس السيسى: «أستاذ أشرف عبد الباقى عنده مسرح كتير.. طب يلا بقى.. ونشوف حاجة لنورهان». آية شلتوت: أكثر شخصية تاريخية تحبها؟ الرئيس: سيدنا محمد وأصحابه قدوة هائلة وخلال الاحتفالية رد الرئيس عبدالفتاح السيسى على سؤال لبطلة ألعاب القوى من ذوى الهمم آية شلتوت، عن أكتر شخصية تاريخية يحبها؟».قائلًا: «النبى محمد صلى الله عليه وسلم وأصحابه اللى هما كانوا مثلًا جميلًا للإسلام والمسلمين». وأضاف: «إحنا الحقيقة واللى حصل خلال السنين اللى فاتت مكوناش مثلًا جميلًا للإسلام والمسلمين، الإرهاب والتشدد والتطرف». وواصل: «أصحاب النبى كانوا رحماء طيبين فاهمين قادرين، لكن إحنا مش كده.. المؤذيين واللى بيؤذوا الناس.. عداوة.. عمرى ماكونت عدو لحد، لكن بكره التطرف والتشدد كفكرة والغلو كفكرة لأنها بتدى قبح شديد لإنسانيتنا، علشان كده باعتبر سيدنا محمد وأصحابه قدوة هائلة». عبدالرحمن أشرف: أهم مشروع تنفذه الدولة؟ الرئيس: «حياة كريمة» أعظم وأكبر مشروع لتغيير حياة المصريين
وخلال الاحتفالية سأل عبد الرحمن أشرف، بطل مصر فى السباحة حول أهم مشروع تنفذه الدولة المصرية؟ وأجاب الرئيس: «أكثر مشروع له تأثير كويس أوى بنعمله مشروع «حياة كريمة».. المشروع مهم ونوفر له الدعم لأنه يمس حياة 60 مليونًا ولو قدرنا نحسن حياة الناس وتيسيرها وإعانتهم هنكون عملنا حاجة كبيرة أوى.. كل القرى فى الريف المصرى». وأضاف: «حتى أكد المعلومة تصور أنك فى بيت ومفيش فيه مياه شرب بانتظام.. يا ترى المعاناة عامله إزاى.. والحياة فى البيت عاملة إزاى.. ولو مفيش كهرباء وصرف صحى البيت ده والبيوت اللى جنبه هيكونوا إزاى.. لو مفيش طريق أو مستشفى أو لو مفيش الخدمات.. بتصور إننا كدولة ومجتمع مدنى وشركات لو عرفنا قيمة العمل وعائده بالنفع على الناس». وتابع: «مشروع حياة كريمة تخلى حد نايم فى بيته سعيد كل يوم.. تحققه له اليسر والسعادة.. قيمته الإنسانية كبيرة وقبل ده كله وبعد ده كله عندنا ربنا اللى بيحسب علينا بالثانية كل شيء.. أعظم وأكبر مشروع لو نجحنا وده تحدى فى الالتزام «.
أحمد طارق: ما هى لعبتك المفضلة؟ الرئيس: أمارس لعبة الكاراتيه منذ 50 سنة وبتعلم صحابها القيم والمبادئ تحدث الشاب أحمد طارق 25 سنة، بطل سباحة وألعاب قوى وفنان كوميدى، وسأل عن الرياضة المفضلة للرئيس السيسى ويحب ممارستها. ورد السيسى: «اللعبة دى بمارسها من 50 سنة.. وكانت لعبة جديدة لعبة الكاراتيه.. لعبة شديدة الانضباط والأدب والخلق الحسن.. وبتعلم صحابها القيم والمبادئ.. الكاراتيه عنده نموذج فريد فى السلوك والقدرة والتعاون والاحترام.. ودى اللعبة اللى بحبها.. ولكن لا أمارسها حاليًا وحفظها كويس وقعدت عمر كبير ألعبها». وردًا على سؤال من الشاب أحمد: «أنت مبسوط وأنت رئيس الجمهروية» قال الرئيس عبدالفتاح السيسى: «ده سؤال صعب أوى.. أنا فى النقطة دى بالذات بقول يا رب أنت تمكن هذا الأمر.. يؤتى الملك من يشاء.. وينزع الملك ممن تشاء.. وبقول لربنا زى ما حملتنى المسئولية.. ساعدنى وأعطينى وقدرنى أن أسعد الدنيا كلها.. ولو ده قدرت عملته هكون راضى إنى توليت الوظيفة دى.. ودائمًا أطلب منه أنه يساعدنى.. ومصر أم الدنيا وهتفضل قد الدنيا بفضل الله وفضلكم».
أحمد طارق: أتمنى أكون عضو بالنادى الأهلى الرئيس: الخطيب بعت الموافقة حالاً.. والأهلى فرحان بعضويتك وتحدث الشاب أحمد طارق من أصحاب الهمم، بطل سباحة وألعاب قوى وفنان كوميدى عن أمنيته مع الرئيس عبد الفتاح السيسى: «عندى أمنية كبيرة.. أنا سباح ونفسى ألعب فى النادى الأهلى»، ليرد عليه الرئيس عبد الفتاح السيسى قائلًا: «لازم النادى الأهلى ياخدك وإحنا قاعدين كده». وأضاف السيسى خلال حديثه مع الشاب أحمد: «النادى الأهلى كله فرحان إنك عضو من أعضائه.. الكابتن محمود الخطيب بعت موافقة على طول دلوقتى، وأعرب الطالب عن سعادته قائلًا: «هطلب إيه أكثر من كده يعنى». مهند عماد: بدعم حضرتك هنغير كتير فى المجتمع الرئيس: شكرًا ليك يا مهند أنت إللى طلبت تدريس مادة «احترام الآخر» تحدث الطفل مهند والذى طالب بتدريس مادة احترام الآخر فى المدارس، خلال احتفالية «قادرون باختلاف» السابقة، وقال: «صباح الخير يا فخامة الرئيس.. مشرفنا ومنورنا.. حضرتك قولت ونفذت.. ومادة احترام الآخر تم تدريسها فى كل المدارس.. دعم وتشجيع حضرتك هنغير كتير فى المجتمع». وقال الفنان مصطفى شعبان: «فى لحظة تاريخية واستجابة سريعة من الرئيس السيسى تم تدريس مادة احترام الآخر»، ليرد الرئيس عبد الفتاح السيسي، قائلًا: «الشكر لمهند هو اللى قالنا وعلمنا». وقال الطفل مهند: «الدولة عملت اللى عليها وحطت قوانين للحفاظ على حياتها فيه ناس فى المجتمع مش بتطبق القوانين دى»، ليرد عليه الفنان مصطفى شعبان قائلًا: «بالتوعية مثل مادة احترام الآخر والبرامج والمسلسلات والأفلام».
مريم محسن: أطلب إصدار الوثائق بطريقة «برايل» الرئيس: سندرس تنفيذ طلبك فى مجمع الوثائق المؤمنة تحدثت مريم محسن، وهى فتاة من بورسعيد تدرس البيانو فى جامعة بلندن، وقالت إن الإتاحة هى أن تتوافر كل خدمات الدولة لذوى الهمم حتى يستطيعوا استخدامها، مشيرة إلى المشاريع التى تقوم بها وزارة الاتصالات والمنتجات الموجودة فى السوبر ماركت ووزارة الآثار التى تعرض بطريقة برايل. وأضافت: «عندى أحلام أكبر وأكبر ونفسى مصر تتطور أكثر وأكثر، ولما استلمت بطاقة الرقم القومى وفكرت أن إيه اللى يأكدلى أن البطاقة بتاعتي، أحلم أن تكون الوثائق الرسمية مكتوب عليها بطريقة برايل، ليرد الرئيس عبدالفتاح السيسى قائلًا: «حالًا يا مريم». وقال الرئيس السيسي: «إحنا عندنا مجمع اسمه مجمع الوثائق المؤمنة ونحط فيها اللى إنتى طلبتيه ده.. هندرس ده ونشوف إذا كان يتوافق مع القوانين الدولية، ولو مفيش تعارض هنعمله فورًا يا مريم».