الشعب: يا افندم عاوز ابلغ عن واحد بيستغل سلطته كمدير للشركة وعمل ملايين من ورا الحكاية دي.. المسئول: اكتب بلاغك وهانحقق فيه بعدين.. الشعب: يا فندم عاوز ابلغ عن مبيدات مسرطنة استوردتها شركة مالكها رجل أعمال كبير قوي من اعضاء الحزب الوطني.. المسئول: اكتب بلاغك وها نحقق فيه بعدين.. الشعب: يا افندم عاوز ابلغ عن وكيل وزارة بياخد رشاوي عشان يعين الناس في الوزارة اللي بيشتغل فيها.. المسئول: اكتب بلاغك وهانحقق فيه بعدين.. الشعب: يا فندم عاوز ابلغ عن ضابط شرطة بيضرب المواطنين اللي بيسألهم عن اي حاجه بمنتهي القسوة وكمان المخبرين بيفرضوا اتاوات علي الصنايعية في السوق.. المسئول: اكتب بلاغك وهانحقق فيه بعدين.. الشعب: يا فندم عاوز ابلغ عن بلطجية اجرهم مرشح في انتخابات مجلس الشعب بيرهبوا الناس عشان ينتخبوه.. المسئول: اكتب بلاغك وهانحقق فيه بعدين.. الشعب: يافندم عاوز ابلغ عن عمليات تزوير شفتها بعيني في الانتخابات الاخيرة بتاعة مجلس الشعب ومعايا الدليل علي كلامي.. المسئول: اكتب بلاغك وهانحقق فيه بعدين.. الشعب: يا فندم عاوز ابلغ عن راجل اعمال كبير قوي واضع يده علي ارض مملوكة للدولة وما حدش قادر يقربله.. المسئول: اكتب بلاغك وهانحقق فيه بعدين.. الشعب: يا فندم عاوز ابلغ عن جاري خريج الجامعة بيهدد بالانتحار لأنه متخرج من سبع سنين وحاصل علي ماجستير والي الآن عاطل قاعد في البيت ابوه بيصرف عليه والواد حالته سيئة جدا.. المسئول: اكتب بلاغك وهانحقق فيه بعدين.. الشعب: يا فندم عاوز ابلغ عن رئيس النقابة اللي بيستغل عربيات النقابة في نقل منتجات مزرعته للتجار في السوق وبيهلك العربيات ويهدد اي سواق برفده لواعترض واتكلم نص كلمة.. المسئول: اكتب بلاغك وهانحقق فيه بعدين.. الشعب: يا فندم عاوز ابلغ عن وجود مجموعة كبيرة من سكان العشوائيات بيشوفوا مجموعات من سكان الكومباوند اللي جنبهم رايحين جايين بعربياتهم والعيال بتحدفهم بالطوب وخايف الموضوع يكبر.. المسئول: اكتب بلاغك وهانحقق فيه بعدين.. الشعب: يا فندم عاوز ابلغ مباحث الضرايب عن الفنانين ولعيبة الكورة اللي بيقبضوا عشرات الملايين يا تري بيدفعوا حق الدولة في الضرايب ولا لأ.. المسئول: اكتب بلاغك وهانحقق فيه بعدين.. الشعب: يا فندم عاوز ابلغ عن عصابة تهريب آثار بتاعة راجل اعمال كبير قوي عنده عشر بازارات في نزلة السمان.. المسئول: اكتب بلاغك وهانحقق فيه بعدين.. الشعب: يا فندم عاوز ابلغ عن راجل عندنا في القرية بياخد عشرين الف جنيه من كل شاب عاوز يسافر بلاد بره يدور علي شغل وبيسفرهم في مراكب بايظة بتغرق بيهم وقبل كده مات عشرة من عندنا بسببه.. المسئول: اكتب بلاغك وهانحقق فيه بعدين.. يا نهار اسود ايه صوت القنابل دي.. هيا الحرب قامت ؟ الشعب: لا ابداً، دي مصر انفجرت، اكتب انت بلاغك وهانسجنك بيه دلوقتي حالاً مش بعدين.. رئيس تحرير مجلة أبطال اليوم الصادرة عن مؤسسة أخبار اليوم