رصد أخطاء المسئولين هو الشغل الشاغل لنشطاء مواقع التواصل الاجتماعى فلا تخلو الصفحات الثورية من النقد اللاذع لحكومة قنديل.. مما يجعل الثناء على نشاط أحد الوزراء ملفتاً للانتباه خاصة من النشطاء الليبراليين وكان سعيد الحظ هو أكثر الأشخاص انتقاداً فى كل العصور بحكم منصبه «وزير التموين».. آخرها ماجاء على لسان النشطاء بعد محاولة اغتياله واستشهاد 2 من مفتشى التموين أثناء تفتيشهم على منظومة الخبز بالدلنجات بطلق نارى.. وتأييدهم لموقف الرجل الذى رفض مغادرة موقع الحادث قبل أن تلقى الشرطة القبض على القتلة . كما نشرت الصفحة القصة على هذا النحو:اللى حصل من يومين إن الوزير بعت 2 مفتشين تموين للمرور على المخابز فى منطقة بدمنهور للتأكد إن كل المخابز ماشية على النظام الجديد.. وهما راجعين اتقتلوا على إيد اتنين قتلوهم وهربوا. لما الوزير عرف من يومين سافر قعد هناك وقال تصريح: إنه مش ماشى لحد ما يتقبض عليهم. وفعلا.. اتقبض عليهم امبارح وطلعوا صاحب مخبز وأخوه من اللى مش عاجبهم النظام اللى اتطبق عليهم! «باسم عودة الكل بيشهد له إنه مثال للوزير الذى تستحقه مصر بعد الثورة...مابيقعدش... من سولار لمخابز لغيره ومش سايب أى حاجة فيها نقطة ضعف إلا وبيبدأ يحسن فيها. أسس نظاما جديدا للمخابز هتوفر كميات أكبر ونوعية أحسن من الخبز وطبعا الكلام معجبش المخابز اللى كانت بتسرق المواد المدعمة وتبيعها فى السوق السودا لأن النظام الجديد بيحدد الكميات وبيفتش كل فترة. علق محمد ربيع بقوله يعنى فى وزرا ممكن تشتغل صح؟ يعنى فى حرامية وقتالين قتلا ممكن يتجابوا فى ساعتها لو فى حد مصحصح؟ «يعنى لو حد اشتغل صح الناس مش هتتبلّى عليه وتقول إنه إخوان وخلاص عشان مش شايفين منه حاجة ؟ وتقول سناء حمدى «كنا من فترة بنقول أخيرا مرسى جاب حد كفء يستاهل مكانه... دلوقتى بنقول لمرسى للأسف شطارة اللى جبته أحرجت نظامك وبينت ضعفه لأنه أثبت للناس إنه اللى عايز يبين شغله فى الأرض هايبينه وشغله حايظهر للناس فى أسوأ الظروف. ومن الصور الأكثر تداولاً على الفيس بوك صورة للوزير الشاب وهو يعتلى عربة أنابيب البوتاجاز وينزل الأنابيب بنفسه للمواطنين تحت عنوان «عارف ده مين افتح الصورة وانت تعرف ؟.. ده باسم عودة وزير التموين». وجاءت تعليقات النشطاء على المشهد بقولهم على النحو التالى: وزير التموين أنا عمرى ما حلمت ولا توقعت إن وزير التموين يطلع على عربية أنابيب - ينزل منها الأنابيب علشان راح لقى بتاع المستودع قافل المستودع - والوزير شمع المستودع ووقف يبيع أنابيب! سمعت انه اكتشف مادة بيحطها على البنزين لو اتخزن يبوووظ عشان يقضى على السوق السودا.
