عالم البنات مليء بالأسرار ولا يعرف تفاصيله سوى البنات لذا قررنا منح هذه المساحة للبنات ليعبرن فيها عن أنفسهن وللحديث عن المشكلات والهموم والقضايا التى تشغل بالهن ويرفض المجتمع فى كثير من الأحيان الاستماع إليها. ويمكن التواصل والمشاركة فى هذا الباب عبر البريد الإلكترونى: [email protected]
شنطة البنات قبل الجواز وبعدها
دايماً بيتريقوا على شنط البنات وازاى مليانة حاجات زى سوق الكانتو
أنا بقى مامتى العزيزة بتسمى شنطتى المخلة
يلا يا اخوانا نفتح الشنطة ونجردها مع بعض
عارفين جرد الانفينتورى اللى بتعمله المصانع
هوه ده بالظبط
1- نوت بوك جواها 20 ورقة غالباً باجردهم كل اسبوعين تلاتة أشوف هما ايه.... فى معظم الأوقات تشمل هذه الأوراق: ريسيتس (وصولات من الشوبينج اللى باعمله)، روشتات، ورق حسابات مصاريف، ليستيت مشتريات لسه هنشتريها من الماركت، ورق اعلانات... بعض من هذا القبيل.
2- السوستة الصغيرة بيبقى محشوووور فيها: قلم كحل، ليب لاينر- مع إنى مبستخدموش وأنا خارجة أبداً... ده كان سى أحمد يقطعنى-، ليب شاين، ماسكارا، مراية من اللى بيتفتحوا دوول- بس أنا معايا النص اللى فيه المراية بس والغطا ضاع-، الفلوس المستخبية من مبدأ لا تضع البيض فى سلة واحدة، البطاقة والرخصة وكارت الايه تى ام- ده لو مش شايلة المحفظة معايا، قصافة ومقص صغير- ومحدش يسألنى ليه؟-، فلاشة، علبة كريم نيفيا صغيرة الحجم.... تخيل معي- عزيزى القارئ- لو كنت شايلة شنطة من غير سوستة من جوه.... كل ده هتلاقيه ملقى فى أرضية الشنطة مع اخواته من الحاجات... وآجى أدور على حاجة أقول: أين أشيائى؟
3- أكياس مناديل فلورا
4- ازازة برفان
5- مروحة من اللى بيتباعوا ف المترو دوول عشان أنا مبستحملش الحر
6- نظارتى الشمسية وقبل ما أعمل الليزك كان بيبقى فى جراب نظارتى النظرية- أقصد بتاعت النظر
7- بنادول أو كيتوفان وبسكوبان وكيناكومب وشوية بلاستر.. صيدلية الطوارئ
8- خيط من غير ابرة عشان لو ملحقتش أظبط وشى قبل ما أنزل
9- أقلام
10- موبايلي، ام بى ثريهي، هاند فرى أو سماعة الام بى ثري
11- فيبيكس
12- هاند سانيتيزر- ديتول
13- مناديل مبللة معطرة- ودى غير الوايبس بتاعت العيال
14- ميدالية مفاتيحى
15- محفظتى: وتشمل بعض الفلوس- مش كتير من نفس مبدأ البيض والسلة الواحدة- وكمان الفلوس الفكة مبينفعش تتحط ف المحفظة من ساعة ما الحكومة بلتنا بالعملات المعدنية- جتها نيلة..، كروووووووت كتييييييرة وبطاقتى بقى ورخصتي- على أساس إنى عندى عربية أو باسوق الهبالة ع الشيطنة، والاقامة وكروت التأمين- طبعاً ده بعد ما جيت السعودى بس... كانت المحفظة ناقصة أصلها...
انتبه معى عزيزى القارئ....عزيزتى القارئة دى شنطتى قبل الجواز لكن بعد الجواز: أضف إلى شنطتك هذه الأشياء الجديدة
16- بامبرز ووايبس
17- شامبو، شاور جيل، بودى لوشون- علب صغير طبعاً
18- بسكويت، جبنة شيدرأو نستو، جيلى كولا أو الدباديب اللى شبهه دي
