ما هو الواحد لوهايكتب مقالته عن تحية كاريوكا كان يبقي للمقالة لازمة وفيها حاجة تنكتب... اهي تحية كاريوكا فنانة عظيمة وليها مراحل في حياتها الفنية تستحق مجلدات... لوها يكتب مقالته عن تحية حليم هايكون ليها لازمة برضه...اهي فنانة عبقرية ونص الجيل م يعرفهاش ومحتاج اللي يفطمه ويعرفه... ولوهاكتب مقالتي عن تحية العلم...اجمل واجمل...اهو ده اللي يستاهل كلنا ننحني ونبوسه ونعظمه ونتلم حواليه ونحميه بدل ما نقعد نردح لبعض... وناخد ولاد امبارح نبراس لينا... وننفخ فيهم ولما يتنفخوا ويفرقعوا ف وشنا ف الاستاد ده والا ده... نرجع نقول معلهش عيال صغيرة ومصر ام الدنيا ونطبطب عليهم.... انما بقي ( وخلوا بالكوا من انما بقي دي ) لوهاتوصل اني اضيع وقتي واكتب مقالتي عن تحية وافيش مسرحية من مسرحيات اليومين دول ... واللي لا مؤاخذة التحية والافيش بياخدوا مجهود من المخرج ف عمايلهم اكتر من اخراج المسرحية نفسها ... يبقي والنعمة عييييب.... وطبعا حد فيكم هيسألني هل انا غيرت الموضوع اللي قلت هاكمله الشهر اللي فات بتاع مقالة بجنيه ونص؟ اللي كانت بتتكلم عن ازمة التسويق ف مسارحنا .. اقوله لا... ده هو ده اصل الموضوع... مش انا ديك النهار قلتلك هو لا مؤاخذة بتوع التسويق هايسوقوا ايه؟ مش لازم مسرحيات حلوة كده تستاهل النزول م البيت... ومرمطة الزحمة ف المواصلات... وخنقة البحث عن خرم ف الشارع تركن فيه حمارتك العرجة اللي بتغنيك عن سؤال اللئيم...قوم بقي وانا فارد صدري وباتعارك العركة دي... ابص يا خويا ألاقيلك عركة اكبر ف مسرح م المسارح قال ايه... الكاست مش عاجبه ترتيب الافيش ويقعد الراجل الكبرة القدير رياض الخولي اللي هو سوبر ستار بالنسبة للاخوة المتعاركين .. يقعد يدادي ده ويدادي دي ..ويا دوب يسلت ايده من العركة دي ويلف يحاول يخرج من المسرح علشان يتطمن علي بقية المسرحيات... هو ب...يلاقي عركة تانية ف نفس المسرح... كأن حد يا ولداه عامل للكاست بتاعهم عمل.. ويتعاركوا علي ترتيبهم ف التحية...ده طبعا غير عركتهم الأولانية عن الاجور وفردة صدر كل واحد وهو بيطلب رقم معظم من غير ما يسأل طبعا...طب هو هياخد الفلوس دي؟ هايجيب كااااام؟ قاعد انا باتكلم من نص ساعة عن معارك... حد فيكم سمع مني حاجة عن موضوع المسرحية اللي الدولة صارفة عليها شيء وشويات... أبدا... لساني هو ب ناحية خط حركة...نفر .. (يعني ابدا بالانجليزي) استعراض... مؤثر موسيقي... بقعة ضوء موحية... باتاتا... الا يا خويا موضوع الساعة ف اي بروفة عرض جديد هانحيي ازاي؟ ترتيبنا عالافيش ايه؟ هاخد كام؟ هما دول التلت اسئلة اللي يفقعوا المرارة...وبعد ده كله يلاقوا نفسهم بيقدموا وهم طبعا ويتسالوا مندهشين... ألا الجمهو ر مابيجيش ليه؟.. ياعم ييجي فين؟...المسرحية؟...وهي فين المسرحية؟ ده الموضوع كله افيش وتحية... هاهاهاها... وطبعا كلامي ده لا ينطبق علي فئتين... النجوم قوي... علشان بيبقوا اكبر من الكلام ده ودي موضوعات منتهية اصلا وهمهم يطلعوا علي المسرح بشكل يحافظ علي تاريخهم اللي تعبوا فيه... والشباب قوي اللي بيضحي بروحه علشان العرض يطلع وبيبات يعمل بروفات ليل ونهار ويحفي توزيع دعوات علشان الجمهو ر يجيله... الشباب اللي بيحيوا مع بعض ويتحطوا عالافيش كلهم مع بعض واللي اجرهم خمس خمس خمس اي واحد من الاخوة الاشاوس بتوع ترتيبي وتحيتي وافيشي ومحفظتي... سلاموا عليكم كلمتين هايفطوا من بقي 1- مع اني مش دكتور سألني صديق محبط يعمل ايه علشان يخلص من اللي عايزين يحبطوه قلتله .. اقف قدام المرايا تلت مرات يوميا وقول انا مصري ..عظيم.. وطول عمري عظيم وكل العالم بتيجي هنا علشان اديها دروس واعلمها وانجمها وبابعت دكاترتي يعالجوهم ومهندسيني يبنوالهم ومدرسيني ينوروهم ومافيش والا واحد من دول ولوعمل قرد هايبقي اجدع مني هاتبقي كويس قوي خلال اسبوع 2 - يا شماتة اللي بيحاولوا يشعللوا الدنيا فينا 3- الدنيا قعدت تدور طول الاسبوع اللي فات عاللي عمل عملة اسكندرية وقعدوا يسألوا يا تري مسلم؟ يهودي؟ قبطي؟ انا قلت احلهالهم بعت قولتلهم اللي عمل العملة دي تصنيفه غير كده خالص تصنيفه.... مجرم... وبس