من أولى ثانوى وأنا عندى حلم واحد نفسى يتحقق، و هو إنى أزور الكعبة، و ده لأنى سمعت إن اللى يشوف الكعبة أول مرة فى حياته ليه دعوة مستجابة إن شاء الله، وأنا طبعا زى كل الناس عندى دعوات نفسي ربنا يحققها لى، عشان كده كل أملى أن اسافر علشان أدعى ربنا ..والحمد لله ربنا كرمنى بعدها بحوالي 10 سنين فى إنى ازور أشرف مكان على وجه الارض وإنى اشوف الكعبة أخيرا. إحساسى بقى لحد دلوقتى مش قادرة اوصفه لحد، وأعتقد أن أى حد راح هناك وشاف الكعبة مش هيقدر يوصف إيه كان شعوره، بس كل اللى قولته بينى وبين نفسى: هى دى الكعبة اللى فعلا بنشوفها فى التليفزيون ؟؟ هو أنا فعلا فى المكان ده، ولا ده أحلى حلم أنا بحلمه دلوقتى، وخايفة حد يصحينى منه؟ أنا فضلت حوالى 10 دقائق كده بس بحاول استوعب الموقف اللى أنا فيه، يااااارب أنت كريم أوى، وأنا بحبك أوى علشان خلتنى أعيش للحظة اللى أشوف أطهر بيت ليك، ويبقى ليا حظ إنى أصلى فيه مع ناس من كل مكان فى الأرض، واحتمال 90% إنى مش هشوفهم تانى غير يوم الحساب. طبعا الدعاء اللى كنت محضراه من 10 سنين قولته، بس مش فاكرة بالظبط الطريقة اللى قولته بيها، أكيد دعيت حاجات تانية يبقى ليا نصيب فيها فى الدنيا وحاجات للأخرة، ويارب يكرم كل واحد مننا إننا نزور الكعبة و الرسول إن شاء الله، بس بجد أنا عمرى ما هنسى أجمل يوم فى حياتى وهو 2 -7 -2011. أمانى يسرى