أطرف حوار ممكن تسمعه فى حياتك دار بين وزير مسئول بالحكومة وبين مذيعين على «راديو مصر» فى برنامج اسمه «اصحى للدنيا»..! الوزير وهو د. جودة عبدالخالق وزير التضامن قال: أنا زعلان من الناس قوى شكاواهم بقت كتير..!! المذيع والمذيعة فى نفس واحد: معلش علشان خاطرنا يافندم اعذرهم برضه الحياة صعبة..!! الوزير، مصراً على زعله وراسه وألف سيف يعاتب الشعب: لا.. لا.. دول بقوا بيشتكوا كتير قوى..!! وتحول الحوار إلى ديالوج كوميدى.. وعندما سأل المذيع والمذيعة الوزير عن رؤيته لحل أزمة السكر قال: المواطن لازم يبقى له موقف.. لو لقى السكر بأكثر من 4 جنيه ونص.. مايشتريش.. وبلاش يا سيدى صينية الكنافة اللى هايعملها.. المهم الكرامة..!! سألاه: طيب والرز..؟! قال الوزير: المواطن اللى يلاقى الأسعار مرتفعة.. يمتنع عن شراء الأرز.. ومش لازم يعمل حَلة محشى..المهم الكرامة..! وظل الوزير هكذا كلما سألاه عن السلع الأساسية..! وأنا طبعاً مع الوزير فى كل ما قاله فأحلى من الكرامة مفيش..!! فكلنا والحمد لله بناكل كل يوم الصبح «طبق كرامة» بالزيت الحار ومعاه فحلين بصل.. أما فى الغدا فبناكل صينية الكرامة بالباشميل.. وهى على فكرة صنف تاكل صوابعك وراه..! ويا سلام بقى لما تاكل لك «عنقودين كرامة» بعد الغدا.. وتحبس بكوباية كرامة فى الخمسينة بالنعناع الأخضر..!! عموماً.. واضح إن معالى وزير التضامن الاجتماعى والعدالة مش عايش معانا فى البلد دى؛ لذلك لا أجد ما أقوله له إلا اسم البرنامج الذى تحدث فيه: يا معالى الوزير.. «اصحى للدنيا»..!! وسلم لى على الكرامة..!!
