* الناس فى الشارع مستاءة وزعلانة من الكلام الفارغ الذى قاله الكاتب علاء الأسوانى للرجل المحترم الفريق أحمد شفيق على الهواء مباشرة.. قبل أن يقدم استقالته من رئاسة الحكومة..! يا جماعة أنا مش على راسى بطحة والكل يعلم، وكتاباتى على مدى أكثر من 17 سنة كلها تؤكد أننى لم ولن أنافق أحد، خاصة إذا كان فى موقع المسئولية، لكن ما حدث مع الرجل المحترم شفيق عيب.. فالرجل لم يقدم لبلده إلا كل خير.. وكان قمة فى العطاء والانضباط فى خدمة مصر.. وهو نفس ما فعله الرجل المحترم اللواء عمر سليمان.. فهما محترمان اختيارهما كان صحيحاً لكن فى التوقيت الخطأ.. وسوف يكتب التاريخ كلمته عنهما..! هذه كلمة حق لا بارك الله فىَّ إن لم أقلها، ولا بارك الله فى غيرى إن لم يسمعها..!! * أرجو من كل المصريين ألا يغضبوا مما قاله «الأخ الحقيد معمر الطاسة» ضدهم وضد مصر.. فليس على المريض حرج..! فالأخ الحقيد زى خالتى شفيقة بالضبط عنده شعرة ساعة تروح وساعة تيجى.. وهو لا يحتاج لمحلل سياسى لتحليل خطبه لكن لمحلل.. بول وبراز.. لا مؤاخذة!! فحضرته واخد دكتوراه فى زفارة اللسان من كلية بيت الراحة بجامعة «دبليوسى».. وهو الوحيد بين كل زعماء العالم اللى بعد ما بيخطب خطبه العصماء بتاعة «من أنتم» والجرذان وشذاذ الأفاق.. لازم يشد السيفون.. لأن كل خطب حضرته بريحه.. ربنا يشفى..!! * بالمناسبة.. الشعب المصرى ده مالوش حل.. سابوا نكت الصعايدة.. وبيقولوا نكت على الأخ الحقيد معمر الطاسة..! آخر نكتة بتقول إنه فعلاً زى ما أكد مش هايسيب ليبيا حتى ولو سابها كل الليبيين.. عارفين ليه؟! علشان لسه مادفعش أقساط «التوك توك» اللى بيركبه..!! * مش ناقص غير وزير مالية ووزير استثمار ووزير تجارة.. وتكتمل «حكومة لومان طرة» ويحلفوا اليمين قدام مأمور السجن ويقسموا بالله العظيم أن يرعوا مصالح السجن والمساجين..! حد فكيك هايقول طيب وهو فيه حكومة من غير رئيس وزراء.. أرد وأقول له عيب بإذن الله رئيس حكومة اللومان هايحلف اليمين قريبا.. وماحدش يسألنى عن اسمه لأنى حالف يمين تلاتة ماأجيبش سيرة لا زيد.. ولا «عبيد»..!! * كلمة ورد غطاها: * يا جماعة أرسوا لنا على بر..! الواقعة إياها اللى سقط فيها شهداء من أغلى شبابنا اسمها إيه: «واقعة الجمل» وللا واقعة الجحش..؟! ** يا سيدى سميها زى ماتسميها واقعة الجمل أو واقعة الخيل والبغال والحمير.. فالمجرمين اللى عملوها من نفس الفصيلة..!!
